लेटाङकी अंशु गौतम हत्या प्रकरण : हत्यारा पक्राउ

उर्लाबारी ।  २१ असोज साँझ मोरङको लेटाङ नगरपालिका-२, स्कुलचोककी बलात्कार पछि हत्या भएकी १३ वर्षीया अंशु गौतमलाई मार्ने अभियुक्त पक्राउ परेका छन । प्रहरीले लामो खोज अनुसन्धान पछि अभियुक्त पत्ता लगाएको हो । आज प्रहरीले दिउसो बिहान ११ बजे पत्रकार सम्मेलन गर्दै घटनामा सङ्लग्नलाई सार्बजनिक गर्दैछ । घटनामा सङ्लग्न गौतमकै छिमेकी ५५ वार्षिय पदम बहादुर अधिकारी रहेका हुन् ।

घटना के थियो ? 

गौतम घर नजिकै पिङ हालेको स्थानबाट बेपत्ता भइन् । बेपत्ता भएको १८ दिनपछि बेलबारी-चिसाङ साझेदारी वनभित्र क्षतविक्षत अवस्थामा उनको शव फेला पर्यो । शरीर र टाउको छुट्टिएको र कपडा नभएको अवस्थामा भेटिएको शवको पहिचान घटनास्थलमा फेला परेको चप्पल र कपडाका आधारमा भयो ।

उनले लगाएको कपडाका आधारमा आफन्तले शवको पहिचान गरे । डीएनए परीक्षण गर्दा म्याच भयो । शव भेटिएपछि प्रहरीले अनुसन्धान सुरु गर्यो ।

प्रारम्भिक अनुसन्धानका क्रममा बलात्कारपछि हत्या भएको अनुमान गरियो । तर प्रहरी निष्कर्षमा पुग्न सकेको थिएन । क्लु नभेटेका कारण प्रहरी अनुसन्धान जटिल बन्यो । यद्यपि, लामो खोज अनुसन्धान पछि प्रहरीले हत्यारा पत्ता लगाउन सफल भएको छ ।

१३ वर्षीय अंशुसँग मोबाइल थिएन । घरदेखि केही पर रहेको पिङसम्म पुगेको छिमेकीले देखेका थिए । २१ असोज बेलुका साढे ५ बजेसम्म उनलाई देख्नेहरू छन् । त्यसपछि कसैले देखेनन् ।

घर नआएपछि राति स्थानीयले खोजी गरे । नभेटेपछि आफन्त प्रहरीसम्म पुगे । सामाजिक सञ्जाल र सोधपुछमार्फत स्थानीय र प्रहरीले खोजी गरे । बेपत्ता भएको १८ दिनपछि जंगलमा दाउरा खोज्नेहरूले सडेको शव भेटेका थिए ।

शवको पोस्टमार्टमपछि प्रहरीले आफन्तलाई बुझाउन सकेको छैन । आफन्तले न्याय नपाएसम्म शव नबुझ्ने अडान लिएका छन्, जसका कारण शव १३ दिनदेखि बीपी कोइराला स्वाथ्य विज्ञान प्रतिष्ठान धरानमै राखिएको छ ।

शुक्रबार नै पक्राउ परे पनि थप अनुसन्धान गर्नुपरेका कारण प्रहरीले अधिकारीलाई सार्वजनिक भने गरेको छैन । स्रोतका अनुसार अधिकारीका मृतक बालिकाभन्दा २ वर्ष कान्छी नातिनीसमेत छन् ।

करिब ५२–५५ वर्षका अधिकारी बालिकाको खोजीमा समेत हिंडेको स्थानीय स्रोतले जनाएको छ । ‘छोराछोरी र नातिनातिनी भइसकेका व्यक्तिले यस्तो घटना गर्छन् भन्ने कल्पनासमेत गरिएको थिएन,’ स्थानीय स्रोतले भन्यो, ‘अझ बेपत्ता बालिकाको खोजीका लागिसमेत उनैले अघिअघि हिंडेका थिए ।’

शव फेला परेपछि भने उनी भारत गएका थिए । प्रहरीले निरन्तरको सम्पर्कपछि उनी नेपाल आएको अवस्थामा पक्राउ गरेको बताइएको छ । अधिकारीलाई नेपाल ल्याउन प्रहरीले धेरै प्रयास गरेको बताइएको छ । ‘प्रहरीले तपाईं छिमेकी हो तपाईंले आएर हत्यारालाई खोज्न सहयोग गर्नुपर्यो भनेर फकाएपछि मात्रै अधिकारी नेपाल आएका हुन्,’ स्थानीय स्रोतले भन्यो, ‘नआएको भए प्रहरी नै भारत जाने तयारी गरेको थियो ।’

हत्यारा पक्राउ नपरेका कारण परिवारले बालिकाको शवसमेत अझै बुझेको छैन । अंशुको शव फेला परेको आज आइतबार ४५ दिन र घरबाट बेपत्ता भएको ६२ दिन भएको छ ।

मोरङ प्रहरीका प्रमुख एसपी कवित कटवाल, डीएसपी कोपिला चुडालसमेत पटकपटक घटनास्थल पुगेर बालिकाको हत्या अनुसन्धानमा खटिएका थिए । मोरङ प्रहरीका प्रहरी निरीक्षक सरोज खनालको नेतृत्व लामो समय लेटाङमै बसेर प्रहरीले अनसुन्धान गरेको थियो । त्यस्तै प्रदेश प्रहरी कार्यालयका डिएसी दुर्गा दाहालको नेतृत्वमा समेत अनुसन्धान टोली खटिएको थियो । त्यस्तै नेपाल प्रहरीको केन्द्रीय अनुसन्धान ब्युरो (सीआईबी) डिएसपीको नेतृत्वमा ब्यूरोको टोली नै आएर अनुसन्धान गरेको थियो ।

मोरङ प्रहरी प्रमुख कवित कटवाल घटनाको अनुसन्धानका लागि केन्द्रीय अनुसन्धान ब्युरोसहितको टोली खटिएपछि अभियुक्त पत्ता लाग्न सफल भएको हो ।  उनका अनुसार शव सडिसकेको र घटनाको प्रकृतिका कारण अनुसन्धानमा जटिलता थियो । 

स्थानीयको दाबी भने बलात्कापछि हतियार प्रयोग गरेर हत्या भयो भन्ने थियो । शरीर र टाउको छुट्टिनुले शंका बढायो । अंगहरू छुट्टाछुट्टै हुनुको कारण जंगली जनवारको आक्रमण पनि हुनसक्ने प्रहरीले आशंका गरेको थियो। 

अंशु स्थानीय लक्ष्मी माध्यमिक विद्यालयमा कक्षा ५ मा पढ्थिन् । प्रहरी स्रोतका अनुसार उनी बेपत्ता भएको दिन पहिलो पटक महिनावारी भएको १२-१३ दिन भएको थियो । नेपाली समाजमा पहिलो पटक महिनावारी हुँदा कडा रूपमा बार्ने चलन छ ।

‘महिनावारीका भएका कारण मुड स्विङ भएर होला, उनी परिवारसँग कुरा गर्दा बेलाबेला झर्किएको भन्ने कुरा छ,’ प्रहरी स्रोतले भन्यो, ‘त्यो दिन दिउँसो आमाले काम अराउँदा मानेकी थिइनन् ।’

प्रहरी टोलीले सूक्ष्म रूपमा अनुसन्धानका लागि सो क्षेत्रमा घटना भएको दिन र त्यसपछि सक्रिय रहेका मोबाइल सिग्नलमाथि अनुसन्धान गरिरहेको थियो । गाउँ टोलमा आउने र आएका नयाँ मानिसमापछि पनि सोधपुछ गर्यो । 

बालिकाको परिवार, विद्यालयका शिक्षक, सहपाठी र छिमेकीसँग पनि प्रहरीले पटकपटक सोधपुछ गर्यो ।

बालिका हराएको सूचनापछि सामान्य रूपमा खोजी गरेको प्रहरीले शव भेटिएपछि विषेश टोली नै परिचालन गरेको थियो । तर निष्कर्षमा भने पुग्ने टुङ्गो छैन ।  प्रहरीले सूक्ष्म रूपमा अनुसन्धान गरिरहेका कारण निष्कर्षमा पुग्ने बताएको थियो। स्थानीयमा भने कञ्चनपुरकी निर्मला पन्तको बलात्कारपछि हत्या जस्तै अपराधी नभेटिने हो कि भन्ने चिन्ता थियो।