‘नाडा अटो शो २०२५’को भव्य तयारी अन्तिम चरणमा, भोलि प्रधानमन्त्री ओलीले उद्घाटन गर्ने
काठमाडौँ । नाडा अटोमोबाइल्स एसोसियशन अफ नेपालले ‘नाडा अटो शो २०२५’को तयारी अन्तिम चरणमा पुगेको छ । यतिखेर प्रदर्शनीस्थल भृकुटीमण्डपमा स्टल निर्माणको काम लगभग सकिने क्रममा छ । अहिले भृकुटीमण्डपमा अटो शोमा सहभागी हुने ब्राण्डहरुले स्टल निर्माणलाई तीव्रता दिइरहेका छन् ।
१९ चार पाङ्ग्रे, १३ लाइट कमर्शियल र ४ दुइ पाङ्ग्रे सवारी ब्राण्डसहित लुब्रिकेन्ट, टायर, स्पेयर पार्टस, ब्याट्री, बैंक तथा वित्तीय संस्थाका गरी कुल १२५ बढी स्टल रहने अटो शोमा नाडाले यसपाली ‘फ्लाइङ कार’ पनि प्रदर्शनी गर्दैछ ।
नाडा अटो शो २०२५ प्रधानमन्त्री केपी शर्मा ओलीले उद्घाटन गर्ने भएका छन् । १७औँ संस्करणको ‘नाडा अटो शो २०२५’ भदौ ३ गतेदेखी ८ गतेसम्म आयोजना हुँदैछ ।
