भुटानी शरणार्थी प्रकरणका फरार अभियुक्त शर्मा पक्राउ
काठमाडौं । नक्कली भुटानी शरणार्थी प्रकरणमा संलग्न रहेका फरार अभियुक्तलाई प्रहरीले पक्राउ गरेको छ।
काठमाडौं जिल्ला प्रहरी परिसरका अनुसार ठगी, लिखत कीर्ते, राज्यविरुद्ध तथा संगठित अपराधसम्बन्धी कसुरमा संलग्न रहेका रौतहट फतुवा हर्साहा–९ का ४२ वर्षीय निराजन उर्फ निरन्जन कुमार खरेल पक्राउ परेका हुन्।
गोप्य सूचनाको आधारमा मिति २०७९/०८० सालमा दर्ता भएको सो प्रकरण अन्तर्गत अनुसन्धान गर्दै जाँदा खरेललाई मिति २०८२ कात्तिक २१ गते पक्राउ गरिएको प्रहरीले जनाएको छ।
प्रहरीका अनुसार खरेलले ठगी गिरोहसँग मिलेमतो गरी पीडितहरूबाट गैरकानुनी रूपमा रकम असुल गर्ने, नगद तथा चेकमार्फत रकम जम्मा गर्ने र ओसारपसार गर्ने कार्यमा संलग्न थिए।
पक्राउ परेका खरेललाई थप अनुसन्धान र कानुनी कारबाहीका लागि सम्मानित काठमाडौं जिल्ला अदालत, बबरमहलमा पेश गरिएको प्रहरीले जनाएको छ।
जिल्ला प्रहरी परिसर, काठमाडौंका प्रवक्ता प्रहरी वरिष्ठ उपरीक्षक शिव कुमार श्रेष्ठले घटनाबारे जानकारी दिँदै भने,
“नक्कली भुटानी शरणार्थी प्रकरणमा संलग्न फरार अभियुक्तलाई पक्राउ गरी अदालतमा पेश गरिएको छ। यस घटनामा संलग्न अन्य व्यक्तिहरूमाथि पनि अनुसन्धान जारी छ।”
