एउटै वडाबाट एक करोडभन्दा बढीको सुन्तला बिक्री

तनहुँ । जिल्लाको व्यास नगरपालिका–१४ स्थित केशवटारबाट यस वर्ष रु एक करोडभन्दा बढीको सुन्तला बिक्री भएको छ । 

उक्त वडामा रहेका सात वटा गाउँबाट उत्पादित रु एक करोड १३ लाख मूल्यको सुन्तला बिक्री भएको हो । 

स्थानीय कृषक चप्पले थापाले आफूले रु १४ लाख बढीको सुन्तला बिक्री गरेको बताए । सुन्तला उत्पादनबाट राम्रो आम्दानी हुन थालेपछि यहाँका अधिकांश कृषक व्यावसायिक फलफूल र तरकारीखेतीतर्फ आकर्षित भएका उनले बताए । 

सबैभन्दा धेरै ठिन गाउँबाट रु ५० लाखको सुन्तला बिक्री भएको वडाध्यक्ष काजीमान श्रेष्ठले जानकारी दिए । उनका अनुसार कुलुङबाट रु २६ लाख ३१ हजार, मरौटेबाट रु नौ लाख, नयाँ गाउँबाट रु आठ लाख, हर्कपुरबाट रु छ लाख, केशवटार र रुम्सीबाट रु एक/एक लाखको सुन्तला बिक्री भएको छ । 

वडाध्यक्ष श्रेष्ठले कृषकलाई फलफूल र तरकारीतर्फ व्यावसायिक बनाउन बिरुवा, बीउ बिजन र कृषि सामग्रीमा अनुदान कार्यक्रमलाई प्रोत्साहन गरिँदै आएको बताए । उनले भने, “वडा कार्यालयबाट ५० प्रतिशत अनुदानमा आठ हजार सुन्तलाका बिरुवा वितरण गरेका थियौँ । ती बोटले पनि फल दिन सुरु गरेका छन्, आउँदो वर्षदेखि अझै उत्पादन बढ्नेछ ।” 

यहाँका २०० बढी किसान व्यावसायिक रूपमा फलफूल र तरकारीखेतीमा लागेका छन् । कृषक लुकबहादुर थापाले रु साढे चार लाख र नेत्र थापा रु चार लाखको सुन्तला बिक्री गरेको बताएका छन् ।