बैंकिङ प्रणालीमा निक्षेप ७५ खर्ब ३० अर्ब नाघ्यो, राष्ट्र बैंकले आज बजारबाट ६० अर्ब नगद तान्ने
काठमाडौं । नेपाल राष्ट्र बैंकले आज फेरि बजारबाट ६० अर्ब रुपैयाँ तरलता तान्ने भएको छ ।
निक्षेप संकलन उपकरणमार्फत केन्द्रीय बैंकले बुधबार २८ दिनका लागि ६० अर्ब रुपैयाँ प्रशोचन गर्ने भएको हो । इच्छुक बैंक तथा वित्तीय संस्थाहरूले दिउँसो २ बजेसम्म आवेदन दिन सक्नेछन् ।
बैंकिङ प्रणालीमा निरन्तर निक्षेप थुप्रिरहेको छ । तर, निक्षेपअनुसार कर्जा लगानी हुन नसकेपछि बैंकहरूको तरलता व्यवस्थापनका लागि राष्ट्र बैंकले निरन्तर निक्षेप संकलन उपकरणमार्फत नगद प्रशोचन गरिरहेको छ ।
उसो त मंसिर महिना लागेसँगै केन्द्रीय बैंकले निक्षेप संकलन उपकरणमार्फत १ खर्ब ७० अर्ब रुपैयाँ तरलता प्रशोचन गरिसकेको छ ।
पछिल्लो तथ्यांकअनुसार बैंकहरूद्वारा संकलित कुल निक्षेप ७५ खर्ब ३१ अर्ब रुपैयाँ पुगेको छ । यता कर्जा लगानी भने ५६ खर्ब ५९ अर्ब रुपैयाँबराबर हुन सकेको छ ।
पछिल्ला दिनमा निक्षेपको तुलनामा कर्जा लगानी केही बढे पनि पर्याप्त तरलता व्यवस्थापन हुन सकिरहेको छैन । यस्तो स्थितिमा बैंकहरूसँग हाल ११ खर्बभन्दा बढी लगानीयोग्य पुँजी (तरलता) छ ।
२८ दिनका लागि जारी हुने निक्षेप संकलन बोलकबोलका लागि बैंकहरुले घटीमा १० करोड र बढीमा ५ करोड रुपैयाँले भाग गर्दा निःशेष भाग जाने अंकसम्मका लागि आवेदन दिन सक्नेछन् ।
