कालीगण्डकीमा स्नान गर्नेको घुइँचो
![कालीगण्डकीमा स्नान गर्नेको घुइँचो](https://snowberry.prixacdn.net/media/gallery_folder/%25E0%25A4%2595%25E0%25A4%25BE%25E0%25A4%25B2%25E0%25A5%2580%25E0%25A4%2597%25E0%25A4%25A3%25E0%25A5%258D%25E0%25A4%25A1%25E0%25A4%2595%25E0%25A5%2580%25E0%25A4%25AE%25E0%25A4%25BE%2520%25E0%25A4%25B8%25E0%25A5%258D%25E0%25A4%25A8%25E0%25A4%25BE%25E0%25A4%25A8%2520%25E0%25A4%25A4%25E0%25A4%25A5%25E0%25A4%25BE%2520%25E0%25A4%25AA%25E0%25A5%2581%25E0%25A4%259C%25E0%25A4%25BE%25E0%25A4%25AA%25E0%25A4%25BE%25E0%25A4%25A0%2520%25E0%25A4%2597%25E0%25A4%25B0%25E0%25A5%258D%25E0%25A4%25A6%25E0%25A5%2588%2520%25E0%25A4%25AD%25E0%25A4%2595%25E0%25A5%258D%25E0%25A4%25A4%25E0%25A4%259C%25E0%25A4%25A8%2520(2)_zL0rVookfC_ponklex8dvwi8y8cr5u9yd7mfayrkmv4s8yctytgqdmdauooq2ru2ymyhrog_kPRwsp3pwy_is0ha41blnoled9ka6exhhy4ingtigppvpblcm8tmzv0en36vmr71afpkwjx.jpg)
पर्वत, ३ साउन :
हिन्दुहरुको पबित्र पर्व हरिशयनी एकादशीको दिन आज घर घरमा तुलसीको बिरुवा रोपेर चतुर्मास व्रत थालनी गरिँदैछ । आजैदेखि चर्तुमास पर्व पनि शुरु हुँदैछ । महत्वपुर्ण पर्व हरिशयनी एकादशीका अबसरमा पवित्र कालीगण्डकी नदिमा स्नान गर्नेको आज बिहानैदेखि घुइँचो लागेको छ । पर्वतको प्रसिद्ध धार्मिक तीर्थस्थल मोदीवेणी, सेतीबेणीधाम, पुर्तिघाट, गोपाङ, नयाँपुल, खनियाघाट, मिलनचोक, वारीबेनी लगायतका नदि तटमा बिहानैदेखि स्नान गर्नेको घुइँचो लागेको छ ।
मोदी र कालीगण्डकी नदीको संगमको रुपमा रहेको मोदीबेणीधाममा भजन कृतनसहित विशेष कार्यक्रम समेत राखिएको छ । त्यस्तै पर्वत, स्याङ्जा र गुल्मी तथा गण्डकी र लुम्बिनी प्रदेशको सिमानामा रहेको विश्वकै ठूलो शालिग्राम शिला रहेको सेतीबेणीमा पनि स्नान गर्न टाढा टाढाबाट श्रद्धालुहरु आइपुगेका छन ।
मोदीवेणीमा स्नान गर्नका लागि पर्वत, बागलुङ्ग,, स्याङ्गजा र कास्कीबाट हजारौको संख्यामा श्रद्धालुहरु आउने गर्दछन भने सेतीबेणीमा पनि बागलुङ्ग, पर्वत, पाल्पा, अर्घाखाँची, स्याङ्गजा र गुल्मीबाट श्रद्धालुहरु आएका छन् । मुक्तिनाथबाट बगेर आएको र साक्षात बिष्णुको अबतारको रुपमा पुजिँदै आएको शालिग्राम पाइने एक मात्र नदी भएकाले कालीगण्डकीमा स्नान गरी मोदीबेणी परिसरमा रहेको नृसिंह मन्दिरमा पुजा गरेमा मोक्ष प्राप्त हुने धार्मिक विश्वास छ ।
कालीगण्डकीमा स्नान गरेमा एक हजार गाई दान गरे बराबरको पुण्य मिल्ने भक्तजनको भनाई छ । हरिशयनी एकादशीको अबसरमा मोदीबेणी र सेतीवेणीमा भजन कृर्तन समेत आयोजना गरिएको छ । आजैका दिन कालीगण्डकीमा स्नान गरेर फर्केपछि घर घरमा रहेका तुलसीको मठमा तुलसी रोप्ने चलन छ । तुलसीको बिरुवालाई धार्मिक तथा स्वास्थ्यको दृष्टिकोणले निकै महत्वपुर्ण मानिन्छ ।
राष्ट्रिय समाचार समिति (रासस)