कैलालीमा पटाका पड्काउन रोक, राति १० बजे पछि देउसी भैलो खेल्न नपाइने

धनगढी, १४ कात्तिक । कैलालीमा राति १० बजेपछि देउसी, भैलो खेल्न नपाइने निर्णय गरिएको छ ।

तिहारको समयमा कानून विपरीतका अवाच्छित गतिविधि हुनसक्ने बताउँदै देउसी भैलो, नाचगान जस्ता मनोरञ्जनात्मक कार्यहरु राति १० बजेपछि गर्न नपाइने जिल्ला प्रशासन कार्यालयले सूचनामार्फत जानकारी गराएको छ ।

आधुनिकताको नाममा नेपाली समाजको संस्कृति, परम्परा, मर्यादा, अनुशासन विपरित छरछिमेक र समाजको समग्र शान्ति नै प्रभावित हुनेगरी कानून विपरितका अवाञ्छित गतिविधि हुनसक्ने भएकाले १० बजेपछि मनोरञ्नजनात्मक कार्य गर्न नपाइने सहायक प्रमुख जिल्ला अधिकारी किरण जोशीले जारी गरेको सूचनामा भनिएको छ । 

पटका, आतिसवाजी जस्ता प्रज्वलनशील पदार्थ पड्काउन र ओसार पासार नगर्नु नगराउनु पनि प्रशासन कार्यालयले अनुरोध गरेको छ । प्रशासनले तोकेको समय भन्दा बढी देउसी भैलो खेलेको तथा अन्य गतिविधि गरेको पाइएमा कानुन अनुसार कारवाही गरिने समेत सूचना बताइएको छ । 

यस्तै, दीपावलीमा दियो, मैनवत्ती, पालाहरु बाल्ने एवम् विद्युतीय उपकरणहरू बालेर दीपावली मनाउँदा आगजनी जस्ता विपद्का घटना हुनसक्ने भएकोले सचेत हुन समेत आग्रह गरिएको छ ।