कैलाली र डडेल्धुराबाट साढे ४ लाख नगदसहित ३७ जुवाडे पक्राउ
धनगढी, १६ कात्तिक । कैलाली र डडेल्धुराबाट साढे ४ लाख बढी नगदसहित ३७ जना पक्राउ परेका छन् ।
प्रहरीका अनुसार, कैलालीबाट ९ र डडेल्धुराबाट २८ जनालाई चार लाख ६८ हजार रुपैयाँसहित पक्राउ गरिएको हो ।
कैलालीको घोडाघोडी नगरपालिका–६ अस्नाराका सहदेब भट्टको कुखुरा फर्ममा जुवातास खेलिरहेको अवस्थामा ३२ वर्षीय नेत्र साउदसहित ९ जनालाई पक्राउ गरिएको प्रहरीले जनाएको छ । उनीहरुको साथबाट २६ हजार ४२० रुपैयाँ नगद र तास समेत बरामद गरिएको बताइएकाे छ ।
यस्तै, डडेल्धुराको गन्यापधुरा गाउँपालिका–३ को गोयल खेतका ३२ वर्षीय दिपक देउवाको घरमा जुवातास खेलिरहेका २८ जनालाई प्रहरीले पक्राउ गरेको छ ।
उनीहरुको साथबाट ४ लाख ४१ हजार ८६९ रुपैयाँ नगद र १६ गड्डी तास बरामद भएको प्रदेश प्रहरी कार्यालयले जनाएको छ ।
पक्राउ परेकाहरुलाई हिरासतमा राखेर थप अनुसन्धान भइरहेको प्रहरीले जनाएको छ ।
