साढे ५ खर्ब लागतका दुई हाइड्रो पीपीपी मोडेलमा निर्माण गरिने, लगानी आह्वान

काठमाडौं, २३ मंसिर । किमाथांका अरुण जलविद्युत् आयोजना र मुगु कर्णाली जलाशययुक्त जलविद्युत् आयोजना सार्वजनिक–निजी साझेदारी (पीपीपी) मोडेलमा बनाइने भएको छ । दुई जलविद्युत् आयोजना ५ खर्ब ५३ अर्ब रुपैयाँ लागतमा निर्माण गर्न हुन लागेको हो । 

यी दुई आयोजनाका लागि वित्तीय लगानी आह्वान गर्दै  विद्युत् उत्पादन कम्पनी लिमिडेटले आशयपत्र मागेको छ । कम्पनीका अनुसार दुई आयोजनामा पीपीपी ढाँचामा लगानी जुटाउने प्रक्रिया अघि बढाएको छ । 

त्यसका लागि स्वदेशी क्षमता अभिवृद्धि गर्न र स्थानीय लगानी प्रोत्साहन गर्न स्वपूँजीको कम्तीमा ५१ प्रतिशत लगानीका लागि प्रस्ताव पेस गर्न सकिने भएको छ ।

कम्पनीका अनुसार, यसका लागि नेपाली नागरिक र नेपाली नागरिक मात्र प्रवर्द्धक रहेको कम्पनी वा संस्थाबाट लगानी प्रस्ताव पेस गर्न सकिने छ । 

किमाथांका अरुणको क्षमता ४ सय ५४ मेगावाट हो । यसको लागत ९३ अर्ब ८० करोड अनुमान छ । मुगु कर्णाली जलाशययुक्त जलविद्युत् आयोजनाको क्षमता १ हजार ९ सय २ मेगावाट हो । जसको लागत ४ खर्ब ६० अर्ब रुपैयाँ हुने अनुमान गरिएको छ । 

१५ दिनभित्र प्रस्ताव पेस गर्न भन्दै  कम्पनीले आज (आइतबार) सूचना जारी गरेको छ ।