सासुको हत्या आरोपमा ज्वाइँ पक्राउ

काठमाडौं, ८ पुस । काभ्रेको मण्डनदेउपुर नगरपालिका–१ गैरीगाउँ घिसिङ टोलकी ५२ वर्षीया तिनमाया तामाङको हत्या गरेको अभियोगमा उनकै ज्वाइँ पक्राउ परेका छन् ।

प्रारम्भिक अनुसन्धानबाट हत्या गरेको खुलेको भन्दै प्रहरीले मृतकका ज्वाइँ २८ वर्षीय सुकबहादुर तामाङलाई पक्राउ गरेको हो । अनुसन्धानका क्रममा   तिनमायाको हत्या सुकबहादुरले नै गरेको खुलेको प्रहरी भनाइ छ ।

तिनमाया तामाङ मंसिर ३० गते आफ्नै घरभित्र मझेरीमा मृत अवस्थामा फेला परेकी थिइन् । जिल्ला प्रहरी कार्यालय काभ्रेका प्रमुख, एसपी बसुन्धरा खड्काले सुकबहादुरले नै हत्या गरेको खुलेपछि यही पुस ५ गते नियन्त्रणमा लिइएको जानकारी दिइन् ।

तिनमायाले काम नगर्ने भनी सधैं गाली मात्र गरिरहने र सोही दिन पनि गाली गरेकोले हत्या गरेको सुकबहादुरले स्वीकार गरेका एसपी खड्काले बताइन् ।

उनले तिनमायालाई मुक्का प्रहार गर्नुका साथै कुटपिट गरेर टाउको थाममा ठोक्काएर हत्या गरेको बयान दिएका बताइएको छ । 

जिल्ला प्रहरी कार्यालयले सुकबहादुरलाई जिल्ला अदालतमा पेश गरी पाँच दिन म्याद थप गरेर अनुसन्धान गरिरहेको जनाएको छ ।