भक्तपुरमा बाबु-छोरा मृत फेला, हत्याको आशंका

काठमाडौं, ८ पुस । भक्तपुरको सूर्यविनायक नगरपालिकास्थित बालकोटमा बाबुछोरा दुवै मृतअवस्थामा फेला परेका छन् ।  

खोटाङ घर भएका ५६ वर्षीय कुलप्रसाद आचार्य र उनका २२ वर्षका छोरा नवीन मृत भेटिएका जिल्ला प्रहरी परिसर भक्तपुरका एसपी माधव बुढाथोकीले जानकारी दिए ।

‘दुई फरक कोठामा बाबुछोराको शव भेटिएको छ । हामी अनुसन्धान गर्दैछौं,’ एसपी बुढाथोकीले भने ।

आइतबार राति तीन बाबुछोरा खाना खाएर सुतेका थिए । सोमबार बिहान भने दुईवटा ढोकामा बाहिरबाट ताला लगाएको अवस्थामा बाबुछोराको शव भेटिएको उनले बताए ।

आइतबार उनीहरूसँगै कुलप्रसादका जेठा छोरा मिलन पनि सँगै सुतेको प्रारम्भिक अनुसन्धानका क्रममा खुलेको छ । तर, उनी अहिले फरार छन् ।

प्रहरीले उनको खोजी कार्य सुरु गरेको जनाएको छ ।

शवमा चोटपटक समेत देखिएको र बाहिरबाट ताला समेत लगाइएको उनीहरुको हत्या भएको हुनसक्ने आशंका गरिएको छ ।