चक्कु प्रहार गरी ललितपुरमा एक किशोरको हत्या, ३ जना पक्राउ

काठमाडौं, ९ पुस । ललितपुरमा एक किशोरको हत्या गरिएको छ ।  हत्या गरेको अभियोगमा प्रहरीले तीन जनालाई नियन्त्रणमा लिएको छ ।

सोमबार राति च्यासलस्थित द टाउन क्याफेमा सुनसरी घर भएका २३ वर्षीय नयन गुरुङको हत्या भएको हो ।

जिल्ला प्रहरी परिसर ललितपुरका एसपी नवरत्न पौडेलले चक्कु प्रहारबाट उनको हत्या भएको पाइएको बताए ।

हत्या आरोपमा प्रहरीले तीन जनालाई पक्राउ गरेर अनुसन्धान थालेको छ ।

पक्राउ पर्नेहरूमा उक्त रेस्टुरेन्टमै काम गन २६ वर्षीय हेमराज भट्ट, काभ्रेका २२ वर्षीय जनकबहादुर तामाङ र दार्चुलाका ४१ वर्षीय पदमलाल भट्ट छन् ।

उनीहरू मध्ये हेमराज भट्टले चक्कु प्रहार गरेको बताइएको छ । बाँकी दुई जनालाई भने सोधपुछका लागि नियन्त्रणमा लिइएको एसपी पौडेलले बताए ।

बेलुका डिनर खाएको बिल तिर्ने क्रममा विवाद हुँदा चक्कु प्रहार भएको प्रारम्भिक अनुसन्धानबाट खुलेको प्रहरीले जनाएको छ ।