कैलालीमा कथित बोक्सी आरोप लगाउँदै महिलामाथि कुटपिट गर्ने ४ जना पक्राउ

काठमाडौं, १० पुस । कैलालीमा बोक्सीको आरोप लगाउँदै २८ वर्षीया एक महिलालाई निर्घात कुटपिट गरेको अभियोगमा चार पक्राउ परेका छन् । 

भजनी नगरपालिका-१ गौनैयाकी २८ वर्षीया महिलालाई बोक्सी भन्दै निर्घात कुटपिट गर्ने गुरुवासहितका चार जनालाई पक्राउ गरेको हो । 

कैलालीका प्रमुख प्रहरी उपरीक्षक (एसपी) पदमबहादुर विष्टले भजनी नगरपालिका–१ का २८ वर्षीय मनोज चौधरी, ५१ वर्षीय बाबुराम चौधरी, ४५ वर्षीय लाहानु चौधरी र ३५ वर्षीय रुपा चौधरीलाई  पक्राउ गरिएको जानकारी दिए । 

ती महिलामाथि बोक्सीको आरोपमा लगाउँदै कुटपिट गरेको किटानी जाहेरीका आधारमा चारै जनालाई इलाका प्रहरी कार्यालय भजनीले पक्राउ गरेको उनले बताए । 

किटानी जाहेरी दिइएका मध्ये दुई जना फरार रहेकाले उनीहरुको खोजी भइरहेको प्रहरीले जनाएको छ ।  पक्राउ परेका मध्ये मनोज चौधरी गुरुवा हुन् । 

यही पुस ४ गते मरणासन्न हुने गरी कुटपिटमा परेकी महिलाको धनगढीको नवजीवन अस्पतालमा उपचार भइरहेको प्रहरीले जनाएको छ ।