शनिबार १० फागुन, २०८१

चेम्बर एक्स्पोको आठौं संस्करण माघ १७ देखि, पाँचदिने प्रदर्शनीमा २०० भन्दा बढी स्टल राखिने

चेम्बर एक्स्पोको आठौं संस्करण माघ १७ देखि, पाँचदिने प्रदर्शनीमा २०० भन्दा बढी स्टल राखिने

काठमाडौं, ११ पुस ।  नेपाल चेम्बर अफ कमर्सले आठौं चरणको ‘चेम्बर एक्स्पो-२०२५’ आयोजना गर्ने भएको छ ।  काठमाडौंको भृकुटीमण्डपमा माघ १७ देखि २१ गतेसम्म ५ दिन चेम्बर एक्स्पो सञ्चालन हुन लागेको हो ।

चेम्बर अफ कमर्सले स्थानीय उत्पादनहरुको प्रर्वद्धन एवं बजारीकरण तथा व्यापार अभिवृद्धि गर्ने उद्देश्यले 'चेम्बर एक्स्पो-२०२५' को आयोजना गरिएको जनाएको छ । 

उद्योग वाणिज्य तथा आपूर्ति मन्त्रालय अन्तरगतको व्यापार तथा निकासी प्रवद्र्धन केन्द्रसँगको सहकार्यमा संयुक्तरुपमा चेम्बरले एक्स्पो गर्न लागेको हो । चेम्बरले व्यापार अभिवृद्धि, स्थानीय बस्तुको बजारीकरणका लागि प्रत्येक वर्ष एक्स्पो गर्दै आएको छ । 

चेम्बरका अनुसार, नेपाली उत्पादनको बजारीकरणलाई विशेष जोड दिएर व्यवसायीक क्षेत्रहरूलाई एकीकृत गर्ने मुख्य उद्देश्य रहेको छ । क्षेत्रीय एवं अन्तर्राष्ट्रिय व्यापारिक समुदायको प्रत्यक्ष सहभागिताले अन्तर्राष्ट्रिय क्षेत्रमा भईरहेका आर्थिक गतिविधी, प्रविधिको प्रयोग एवं व्यापार व्यवस्थापनका नयाँ आयामहरूलाई नजिकबाट नियाल्न सहयोग पुग्ने चेम्बर मेला समितिका सभापति राष्ट्रभुषण चाकुबजीको भनाइ छ । 

चेम्बर एक्स्पोमा नेपाल, बंग्लादेश, भारत, चीन, थाईल्याण्ड, युएई, दक्षिण कोरिया,  मलेसिया र पाकिस्तान लगायतका देशहरुमा उत्पादित बस्तुहरुको प्रर्दशनी र व्यवसायीहरुले सहभागिता जनाउनेछन ।

एक्स्पोमा हस्तकलाका बस्तु, सवारी साधन, घर–जग्गा व्यवसायी, खाद्य एवं पेय पदार्थ, पहिरन, पाठ्य, पुस्तक, ज्वेलरी, कस्मेटिक बस्तु, निमार्ण सामाग्री, साना तथा घरेलु उद्योगका उत्पादन, विद्युतीय उपकरण तथा अन्य उपभोग्य सामग्रीहरू प्रदर्शनमा रहने छन् । 

स्वदेशी र विदेशी गरी २ सय भन्दा बढी स्टलहरु एक्स्पोमा राखिनेछन् । ५ दिन सम्म चल्ने एक्स्पो कम्तिमा ५० हजार दर्शकले अवलोकन गर्ने आयोजक नेपाल चेम्बर अफ कमर्सका मेला समिति संयोजक चाकुबजीले जानकारी दिए । अटो पेवेलियन, स्वदेशी खानाको परिकार र बालबालिकाका लागि प्ले जोन पनि राखिने एक्स्पोको व्यवस्थापन गरिरहेको इन्ट्रोडक्सन ट्रेड सोज नेपालले जनाएको छ ।