खो-खो विश्‍वकप: नेपाली पुरूष टिम क्‍वाटरफाइनलमा

काठमाडौं, ३ माघ । भारतमा जारी खो–खो विश्वकपमा नेपालको पुरूष खो-खो टिम क्‍वाटरफाइनलमा प्रवेश गरेको छ । बिहीबारको खेलमा भुटानमाथि जित निकाल्दै नेपालले क्‍वाटरफाइनलमा स्थान पक्का बनाएको  हो । 

समूह ए अन्तर्गत बिहीबार भएको खेलमा नेपालले तेस्रो जित निकाल्ने क्रममा भुटानलाई ९८-८ अंकको अन्तरले पराजित गरेको हो । त्यसअघि बुधबार भएको खेलमा नेपालले ब्राजिललाई १३४-८ को फराकिलो अन्तरले हराएको थियो ।

पहिलो खेलमा भारतसँग पराजित भएको नेपालले दोस्रो खेलमा पेरूलाई पराजित गरेको थियो । अब भुटानले भारतसँग खेल्न बाँकी छ । उक्त खेलपछि दुईमध्ये एक टोली क्‍वाटरफाइनलमा पुग्ने छन् ।

महिलातर्फ पनि नेपालले लगातार तीन खेल जित निकाल्दै क्‍वाटरफाइनलमा पुग्ने सम्भावना बलियो बनाएको छ ।  हरेक समूहबाट शीर्ष दुई टोली क्वाटरफाइनलमा प्रवेश गर्नेछन् ।