जुवातास खेलिरहेको अवस्थामा काठमाडौं र भक्तपुरबाट १३ जना पक्राउ

काठमाडौं, ६ माघ । भक्तपुर र काठमाडौंबाट जुवातास खेलेको अभियोगमा १३ जना पक्राउ परेका छन् ।

शनिबार साँझ बुढानीलकण्ठ नगरपालिका–८ भंगाल बस्ने मिलन शाहको टहरामा जुवातास खेलिरहेको अवस्थामा मिलन समेत ७ जनालाई नियन्त्रणमा लिइएको प्रहरीले जनाएको छ । 

प्रहरी वृत्त महाराजगंजबाट खटिएको प्रहरी टोलीले उनीहरूलाई नगद ५५ हजार ४ सय २०रूपैयाँ र ६ बुक तास सहित पक्राउ गरेको हो ।

यसैगरी, भक्तपुर नगरपालिका–१ चुनदेबीस्थित नरबहादुर खड्काको आरबिके सप्लायर्समा जुवातास खेलिरहेको अवस्थामा ६ जना पक्राउ परेका छन् ।

भक्तपुर सल्लाघारी बस्ने सिन्धुली कमला–७ घर भएका ५२ वर्षीय ओमबहादुर जोगीसमेत ६ जनालाई शनिबार दिउँसो  प्रहरीले पक्राउ  गरेको  छ । जिल्ला प्रहरी परिसर भक्तपुरबाट खटिएको प्रहरी टोलीले उनीहरूलाई नगद ४४ हजार ६ सय रूपैयाँ र १ बुक तास सहित पक्राउ गरेको प्रहरीले जनाएको छ ।