प्रहरीबाट निर्घात कुटिए युवक, सामाजिक सञ्जालमा भिडियो भाइरल

चितवन, ७ माघ  । चितवनको भरतपुर महानगरपालिकाको बाइपास सडकखण्डमा प्रहरीले एक युवकमाथि निर्घात कुटपिट गरेको भिडियो अहिले सामाजिक सञ्जालमा भाइरल भैरहेको छ ।

प्रहरीले कुटपिट गरेको भिडियो भाइरल भएपछि प्रहरीले अनुसन्धान गर्न सुरु गरेको छ । घटनाको सत्य तथ्य पत्ता लगाउन अनुसन्धान गर्न थालेको चितवनका प्रहरी प्रमुख एसपी गौतम मिश्रले बताए । 

भरतपुरको बाइपास रोड क्षेत्रमा रातको समयमा प्रहरीले निर्घात कुटपिट गरिरहेको सार्वजनिक भएको भिडियोमा देख्न सकिन्छ ।

उक्त भिडियोमा देखिएअनुसार, मोटरसाइकलको लाइसेन्स चेक गरिरहेको र त्यसपछि सडक पेटी छेउमा सेतो सर्टमा रहेका मानिसलाई प्रहरीले बुटले पटक पटक हानेको र लात्तैलात्ताले हानेको देखिन्छ । 

प्रहरीले गरेको कार्यको यो भिडियोमा सर्वसाधारणले चासोको रूपमा लिएका छन् । केन्द्रीय प्रहरी प्रवक्ता दिनेश आचार्यले भने यो भिडियो पुरानो भएको दाबी गरेका छन् ।