चितवनमा प्रहरीले युवक कुटेको भिडिओ भाइरल, निर्घात कुटपिट गर्ने प्रहरी निलम्बित

चितवन, ७ माघ । चितवनमा युवकलाई निर्घात कुटपिट गरेका प्रहरी निलम्बित भएका छन् । असई बुद्धिबहादुर भुजेल निलम्बनमा परेको चितवन जिल्ला प्रहरी कार्यालयका एसपी गौतम मिश्रले जानकारी दिए ।

घटना पुस १५ गते भरतपुर महानगरपालिका–११ तीनखोले गुम्बा नजिकै बाइपास रोडमा भएको खुलेको छ । असई भुजेल अस्थायी प्रहरी बिट गणेशधाममा कार्यरत थिए ।

सामाजिक सञ्जालमा भिडिओ भाइरल बनेपछि प्रहरीले अनुसन्धान अगाडि बढाएको थियो । डिएसपी ज्ञानकुमार महतोको संयोजकत्वमा घटनाबारे छानबिन भएको हो ।

‘चितवन जिल्ला भरतपुर महानगरपालिका–११ बसेनी चोकमा गस्ती गर्ने क्रममा एक युवकलाई प्रहरीले कुटपिट गरिरहेको भिडिओ सामाजिक सञ्जालमा सार्वजनिक भएको सन्दर्भमा नेपाल प्रहरी प्रधान कार्यालयको गम्भीर ध्यानाकर्षण भएको छ,’ प्रहरी प्रधान कार्यालयद्वारा जारी विज्ञप्तिमा भनिएको छ।

यस्तै विज्ञप्तिमा पदीय मर्यादा र आचरण विपरीतका क्रियाकलाप गर्ने प्रहरी कर्मचारीलाई कारबाहीको दायरामा ल्याउन जाँचबुझ गर्नका लागि सोमबार नै जिल्ला प्रहरी कार्यालय, चितवनले छानबिन समिति गठन गरेको पनि उल्लेख छ । ‘घटनामा संलग्न प्रहरी कर्मचारी उपर विभागीय कारबाही प्रक्रिया अगाडि बढाइसकेको ब्यहोरा जानकारी गराउँदछौँ,’ विज्ञप्तिमा भनिएको छ ।