ओली सरकारको आयु धेरै छैन: प्रचण्ड

काठमाडौँ, ८ माघ ।  प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल प्रचण्डले एमाले अध्यक्ष केपी ओली नेतृत्वको गठबन्धन सरकारको आयु धेरै नभएको दोहोर्‍याएका छन् । आज (मंगलबार) चितवनमा सञ्चारकर्मीसँग कुराकानी गर्दै ओली सरकारको भविष्यवाणी गरेका हुन् । 

पूर्वप्रधानमन्त्री समेत रहेका प्रचण्डले कांग्रेसका पूर्वमहामन्त्री डा.शशांक कोइराला, नेता डा. चन्द्र भण्डारीलाई दायाँबायाँ राखेर यो सरकार धेरै दिन नटिक्ने दाबी गरेका हुन् ।

‘यो सरकार धेरै जान्छ भन्ने हामीलाई लाग्दैन । मैले प्रस्ट भन्ने गरेको छु । यो प्राकृतिक छैन । स्वाभाविक छैन । पारदर्शी छैन । सरकारले गरेका कामहरू पनि उल्टापाल्टा हुँदै गएका छन् । अध्यादेशसम्म आउँदा लाजमर्दो भएको छ,’ उनले भने । 

प्रचण्डले यसोभन्दा कांग्रेस नेता भण्डारी मुसुमुसु हाँस्दै कानेखुसी गरिरहेको भिडियोमा देख्न सकिन्छ । यस्तै, नेता कोइरालाले पनि सरकार ढल्न सक्ने सङ्केत गरे । राजनीतिमा सरकार तलमाथि हुनुलाई स्वाभाविक हुने उनको तर्क थियो । 

‘दुई ठुलो दल मिलेर स्टेबल सरकार दिने हाम्रो चाहना थियो । त्यसैले सरकार तलमाथि हुने सम्भावना कम छ । तर, नहुने होइन राजनीति हो जे पनि हुन सक्छ’, उनले भने । 

यस्तै संविधान संशोधनको कुरा पनि सत्ता गठबन्धनले प्रस्ट पार्नुपर्ने बताए ।