फिल्म ‘एक्टर : टेक वन’ को प्रदर्शन रोक्न भन्दै अदालतमा रिट दायर

काठमाडौं, १३ माघ । फिल्म ‘एक्टर’ र ‘एक्टर : टेक वन’बीच नामलाई लिएर उत्पन्न विवाद अदालतमा प्रवेश गरेको छ ।। फिल्म रिलिजपूर्व ‘हामी नै असली एक्टर हौं’ भन्दै पत्रकार सम्मेलन गरेका निर्माताले आइतबार अभिनेता प्रदीप खड्काको मुख्य भूमिका रहेको ‘एक्टर स् टेक वन’को प्रदर्शन रोक्न माग गर्दै जिल्ला अदालत काठमाडौंमा रिट दायर गरेका छन् ।

‘एक्टर’को प्रस्तुतकर्ता कम्पनी नेपाली डायस्पोरा इन्टरटेन्मेन्टको तर्फबाट सम्राट थापाले अदालतमा दर्ता गरेको रिटमा प्रतिलिपि अधिकार बमोजिम कारबाही गरेर क्षतिपूर्ति दिन आदेश माग गरिएको छ । उनले रिटमा बौद्धिक सम्पत्ति चोरी गरेर ‘एक्टर’ नाममा अर्को फिल्म बनाउने कार्य अनैतिक रहेको र यसबाट आफूलाई धेरै क्षति हुने अवस्था रहेको उल्लेख गरेका छन् ।

‘विपक्षीहरुको कार्यले मेरो फिल्मको विषयमा आम दर्शकहरुका माझ भ्रमको अवस्था सिर्जना भई मेरो फिल्मले तत्काल आशातित व्यवसाय गर्न नसकेको अवस्था छ भने मैले निकट भविष्यमा विदेशमा चलचित्र प्रदर्शन गर्ने योजना बनाएकोमा विपक्षीहरुको कार्यले मलाई धेरै क्षति हुने अवस्था छ,’ रिट निवेदनमा ‘एक्टर स् टेक वन’को नाम परिवर्तन गर्न समेत आदेश माग गरिएको छ ।

साथै, रिटमा मुद्धाको अन्तिम किनारा नलागेसम्म फिल्मको प्रदर्शन रोक्न माग गर्दै भनिएको छ, ‘हाम्रो नाम तथा कथावस्तु चोरी गरि निर्माण गरेको ‘एक्टर’ यहि माघ १६ गते देशव्यापीरुपमा प्रदर्शन गर्ने मिति तय गरिएको छ । उक्त दिन सो चलचित्र प्रदर्शन गरेमा प्रस्तुत मुद्धाको औचित्य समाप्त हुने हुँदा, मुद्धाको अन्तिम किनारा नभए सम्मका उक्त चलचित्रलाई कहिँ कतै प्रदर्शन नगर्नु नगराउनु भनि रोक्काको आदेश जारी गरिपाउँ ।’

‘एक्टर’ बक्स अफिसमा ‘डिजास्टर’ भइसकेको छ । धेरै हलमा दर्शक अभावका कारण फिल्मको एक शो पनि चल्न सकेन । यो फिल्मलाई मदन घिमिरेले निर्देशनज गरेका थिए । यसमा  प्रिन्स थापा, कशिस दाहाल, सरोज खनाल, शिवु शाह, मनीषा पाण्डे, निशा केसी भण्डारी, महेन्द्र मैनालीलगायत कलाकारको अभिनय थियो ।

राजन भुसालको निर्देशनमा बनेको ‘एक्टर स् टेक वन’मा प्रदीपसहित आना शर्मा, दिव्या रायमाझी, राजबल्लभ कोइराला, सुशील सिटौला, निश्चल बस्नेत लगायतको अभिनय छ । थमन कुमार भण्डारीको निर्माण रहेको फिल्मको गीत र ट्रेलरबाट राम्रो हाइप बनेको छ । तर, अर्को ‘एक्टर’का निर्माताले अदालतमा रिट दायर गरेकाले अब फिल्मको प्रदर्शन के हुन्छ भन्ने अन्योलता छाएको छ ।