होटेलको सीसीटीभी फुटेज र बिल झिकाइ पाऊँ भन्दै रास्वपा सांसद कठायतले दिइन् उजुरी

काठमाडौं, १३ माघ । राष्ट्रिय स्वतन्त्र पार्टी (रास्वपा) की सांसद विनिता कठायतले कृषि समितिका सदस्यहरु बसेको पोखराको होटलको सीसीटीभी फुटेज झिकाएर छानबिन गर्न माग गरेकी छन् । उनले समितिमा लिखित उजुरी दिँदै सो माग राखेकी हुन् ।

प्रतिनिधिसभाको कृषि, सहकारी तथा प्राकृतिक स्रोत समितिका सदस्यहरू साताव्यापी अनुगमनका क्रममा पोखरा गएका थिए । उनीहरु २९ पुसमा होटल ओपन हाउसमा बास बसेका थिए । त्यस रात समितिका सदस्यहरूले रक्सी खाँदै रास्वपाका नेताहरूबारे व्यक्तिगत टिकाटिप्पणी गरेको आरोप कठायतले लगाउँदै आएकी छन् ।

तीन दिनअघि कृषि समितिको वैठकमा उनले भनेकी थिइन्, ‘सुमनाले कतिजनासँग बिहे गरिन् भन्ने तपाईंहरुको सरोकारको विषय थियो त्यहाँ ? रवि लामिछानेले को-कोसँग विवाह गर्‍यो भनेर ह्यारेसमेन्ट गर्ने ? त्यहाँनेर ड्रिङ्स गरेर, रक्सी खाएर तपाईंहरूले जे पायो त्यही बोल्न मिल्छ ? नेपाली कांग्रेसको पनि लिस्ट निकाल्ने हो भने धेरैजनाको छ सभापतिज्यू, कसले कतिजनासँग विवाह गरेका छन् भनेर ।’

सांसद कठायतले आक्रोशित अभिव्यक्ति दिएपश्चात समिति सभापति कुसुम थापासँग उनको चर्काचर्की परेको थियो ।