त्रिदेशीय महिला टी-२० क्रिकेट: थाइल्यान्डसँग नेदरल्यान्ड्स पराजित

काठमाडौं, १८ माघ । जारी त्रिदेशीय महिला टी(२० क्रिकेटमा थाइल्यान्डले विजयी सुरुवात गरेको छ । सिरिजको दोस्रो खेलमा शुक्रबार थाइल्यान्डले नेदरल्यान्ड्सलाई ८ विकेटको फराकिलो अन्तरमा पराजित गर्यो । उद्घाटन खेलमा बिहीबार नेदरल्यान्डले नेपाललाई २० रनले हराएको थियो।

कीर्तिपुरस्थित त्रिवि क्रिकेट मैदानमा नेदरल्यान्ड्सले दिएको १२३ रनको लक्ष्य थाइल्यान्डले १८ ओभरमा २ विकेट गुमाएर पूरा गर्यो । उसको जितमा नान्नापत कोन्चारोन्काइले नटआउट ५६ र अफिसारा सुवान्चोराथीले २८ रनको योगदान गरिन् । नाथ्थाकन चन्थामले नटआउट २३ रन बनाइन्।

यसअघि पहिला ब्याटिङ गरेको नेदरल्यान्डले निर्धारित ओभरमा ६ विकेट गुमाएर १२२ रन बनाएको थियो । डच टोलीका लागि क्याप्टेन बाबेट्टे डी लिडले ५२ र इरिस विलिङले २८ रन जोडेका थिए । अन्य ब्याटरले दोहोरो अंक छुन सकेनन् ।

सिरिजअन्तर्गतको तेस्रो खेलमा नेपालले थाइल्यान्डसँग प्रतिस्पर्धा गर्नेछ । आफ्नो पहिलो खेलमा नेदरल्यान्ड्ससँग पराजित नेपाल पहिलो जितको खोजीमा हुनेछ ।