२२ वर्षीय युवक : जसले अनलाइनमा ठगेर बनाए काठमाडौँमा घर, बैंकमा ४ करोड ब्यालेन्स

काठमाडौँ , २३ माघ । कैलालीको बर्दगोरिया–६ निवासी माइकल डंगौरा अनलाइन स्क्याम र क्रिप्टोकरेन्सी कारोबारमा संलग्न रहेको आरोपमा केन्द्रीय अनुसन्धान ब्यूरो (सीआईबी) को हिरासतमा छन्।

बुढानीलकण्ठ नगरपालिका–८ स्थित भंगालमा बस्ने २२ वर्षीय डंगौराले सूचना प्रविधिको अध्ययनलाई दुरुपयोग गर्दै अनलाइनमार्फत ठगी धन्दा सञ्चालन गरेको अनुसन्धानले देखाएको छ।

२०८१ पुस पहिलो साता पक्राउ परेका डंगौराले अनलाइन ठगीबाट आर्जित रकम प्रयोग गरी काठमाडौँको भंगालमा ३.५ करोडको घर र क्रेटा गाडी किनेका थिए। उनको बैंक खातामा ४ करोड रुपैयाँ मौज्दात रहेको पाइएको छ। सीआईबीका प्रवक्ता एसपी सुधिरराज शाहीका अनुसार, बैंक खातामा रहेको रकम रोक्का राखेर अनुसन्धान अघि बढाइएको छ।

डंगौराले डेढ वर्षदेखि ठगी धन्दा सञ्चालन गर्दै आएको खुलासा भएको छ। उनले आफ्नो गाउँमा समेत भव्य घर बनाएका थिए। गाउँमा आउजाउ गर्ने क्रममा उनले अनिल विश्वकर्मालाई काम गर्न प्रस्ताव गरेका थिए। २६ वर्षीय अनिल, जो बेरोजगार थिए, माइकलको निर्देशनमा विभिन्न बैंक खाता खोलेर रकम ट्रान्सफर गर्ने काम गर्थे। उनलाई कैलालीबाट पक्राउ गरिएपछि माइकल पक्राउ परेका हुन्।

अनलाइन स्क्याम र हुण्डी कारोबारमा संलग्न सात जना पक्राउ

माइकल र अनिलसँगै क्रिप्टो करेन्सी, अनलाइन स्क्याम र हुण्डी कारोबार गरेको आरोपमा ७ जना पक्राउ परेका छन् । पक्राउ पर्नेमा बुढानीलकण्ठ बस्ने २९ वर्षीय पियुष श्रेष्ठ, दोलखा घर भएका १९ वर्षीय आश्विन चौलागाईं, रौतहट घर भएका २२ वर्षीय सत्यम कुमार सहनी, काठमाडौँ बस्ने भारतीय नागरिकद्वय २७ वर्षका रोशन कुमार र ३६ वर्षीय मुन्ना कुमार छन् ।

अनुसन्धान अनुसार, यी व्यक्तिहरूले हालसम्म ३ अर्ब रुपैयाँ ठगी गरिसकेको प्रारम्भिक रिपोर्ट छ। एसपी शाहीका अनुसार, मोबाइलको डिजिटल फरेन्सिक रिपोर्ट आएपछि ठगीको वास्तविक परिमाण अझै बढ्न सक्छ।

ठगीको कार्यशैली

उनीहरू सामाजिक सञ्जालमा लिंक पठाएर पीडितलाई क्लिक गर्न उक्साउँथे। एकचोटि लिंक क्लिक गरेपछि, पीडितको वालेटमा पहुँच बनाएर ओटीपी मागेर ह्याक गर्ने गर्थे। त्यसपछि माइकलको निर्देशनमा विभिन्न खातामा रकम ट्रान्सफर गरिन्थ्यो।

यी ठगहरूले ‘घरमै बसेर कमाउन सकिन्छ’ भन्ने अफर दिएर सर्वसाधारणलाई आफ्नो बैंक खाता नम्बर दिन उक्साउँथे। यस्ता खाताहरूमा ठगीको रकम पठाएर खाताधारकलाई १०५ कमिशन दिएर अन्य खातामा ट्रान्सफर गर्न लगाइन्थ्यो।

हुण्डी कनेक्सन र अन्तर्राष्ट्रिय संलग्नता

यस प्रकरणको अनुसन्धानका क्रममा ठगहरूले विदेशबाट हुण्डीमार्फत रकम नेपाल ल्याउने र क्रिप्टोमा रूपान्तरण गर्ने गरेको भेटिएको छ। माइकल डंगौरा समूहसँग सम्बन्धित एक जना बंगलादेशी नागरिक क्रिप्टो कारोबारमा संलग्न रहेको प्रहरीको अनुसन्धानले देखाएको छ।

हाल माइकलसहित पक्राउ परेका सात जनामाथि संगठित ठगी मुद्दामा अनुसन्धान भइरहेको छ। एसपी शाहीका अनुसार, अनुसन्धानको दायरा क्रिप्टोकरेन्सी कारोबारसम्म विस्तार गरिनेछ।