रुसविरुद्धको साइबर गतिविधिसम्बन्धी कारबाही रोक्न अमेरिकी रक्षा प्रमुखद्वारा निर्देशन
वासिङ्टन, १९ फागुन । अमेरिकी रक्षामन्त्री पीट हेगसेथले रुसविरुद्धको साइबर कारबाहीलाई रोक्न आदेश दिनुभएको अमेरिकी सञ्चारमाध्यमले जनाएका छन् ।
न्युयोर्क टाइम्सका अनुसार यो आदेश मस्कोविरुद्ध अमेरिकी कारबाहीको समग्र पुनर्मूल्याङ्कनको एक हिस्सा हो ।
एएफपीले सोधेको प्रश्नमा पेन्टागनले कुनै टिप्पणी गर्न अस्वीकार गरेको छ ।
एक वरिष्ठ रक्षा अधिकारीले भन्नुभयो, “परिचालन सुरक्षा चिन्ताका कारण हामी साइबर इन्टेलिजेन्स, योजना वा कारबाहीबारे टिप्पणी गर्दैनौँं र छलफल पनि गर्दैनौँ।”
उहाँले भन्नुभयो, “साइबर डोमेन समावेश गर्न सबै अपरेसनहरूमा ‘वारफाइटर’को सुरक्षाभन्दा रक्षामन्त्री हेगसेथको ठूलो प्राथमिकता छैन।”
अमेरिकी राष्ट्रपति डोनाल्ड ट्रम्पले युक्रेनमा युद्ध अन्त्यका लागि वार्ताका लागि दबाब दिइरहेका बेला र ह्वाइट हाउसमा भएको बैठकमा अमेरिकी नेताले आफ्ना युक्रेनी समकक्षी भोलोदिमिर जेलेन्स्कीको आलोचना गरेको केही दिनपछि यो परिवर्तन आएको हो ।
पश्चिमा देशहरूले क्रेमलिनले युक्रेनको समर्थनलाई कमजोर पार्ने उद्देश्यले श्रृङ्खलाबद्ध घटनाहरूको योजना बनाएको आरोप लगाएका छन्।
यसैबीच, ट्रम्पले आफूलाई रुसी राष्ट्रपति भ्लादिमिर पुटिन र जेलेन्स्कीबीचको मध्यस्थकर्ताको रूपमा प्रस्तुत गर्दै पुटिनसँग सम्बन्ध गाँस्ने क्रममा किएभ र युरोपलाई किनारा लगाउनुभएको छ ।
“हामीले पुटिनको बारेमा चिन्ता गर्न कम समय बिताउनुपर्छ,” ट्रम्पले आइतबार राति आफ्नो ‘ट्रुथ सोसल प्लेटफर्म’मा लेख्नुभएको छ ।
अमेरिकी राष्ट्रिय सुरक्षा सल्लाहकार माइक वाल्ट्जले आइतबार सीएनएनसँगको कुराकानीमा रुससँगको सम्बन्ध पुनः खोल्ने विषयमा कुरा गर्दै साइबर नीति परिवर्तनको खबरको खण्डन गर्नुभएको छ ।
वाल्ट्जले भन्नुभयो, “यो हाम्रो छलफलको हिस्सा भएको छैन। यस युद्धको अन्त्य गर्न सबै प्रकारका दण्ड र पुरस्कारहरू लागु हुनेछन्।”
