सरकारले सदनलाई हेपिरहेको छ : माओवादी
काठमाडौं, २८ फागुन । प्रमुख प्रतिपक्षी नेकपा माओवादी केन्द्रले सरकारले संसद्लाई महत्त्व नदिएको बताएको छ । बुधबार प्रतिनिधिसभाको बैठकमा एक जना पनि मन्त्री अनुपस्थित रहेपछि माओवादी केन्द्रले यस्तो टिप्पणी गरेको हो ।
बैठक सुरु भए लगत्तै माओवादी केन्द्रका प्रमुख सचेतक हितराज पाण्डे उठे । सभामुख देवराज घिमिरेले समय दिएपछि पाण्डेले सरकारले जनप्रतिनिधिहरूलाई हेपिरहेको बताएका हुन् ।
‘सरकार सदनलाई हेपिरहेको छ । सरकार जनप्रतिनिधिहरूलाई हेपिरहेको छ’ उनले भने । हरेक कुरामा सरकारले सदनलाई कम महत्व दिएको उनको भनाइ छ ।
‘त्यो एउटा कुरामा होइन, हरेक कुरामा हेपिरहेको छ । हाम्रा अभ्यासहरू सरकार मानिरहेको छैन । अहिले सदन सुरु भयो । तर, मन्त्रीहरू, सरकारको प्रतिनिधि कोही पनि छैनन’ पाण्डेले सभामुख घिमिरेको ध्यानाकर्षण गरे ।
संसदीय समिति र उपसमितिको बैठकहरूमा प्रतिपक्षी दलका सांसदहरू उपस्थित हुने तर सरकार उपस्थित नहुने गरेको उनले बताए ।
प्रतिनिधि सभा नियमावली अनुसार मन्त्रीको उपस्थिति बिना सभाको बैठक चल्न नसक्ने बताए । त्यसपछि सभामुख घिमिरेले १५ मिनेटका लागि बैठक स्थगित गरे ।
प्रतिनिधिसभा नियमावलीको नियम ६ मा बैठकको सञ्चालन र स्थगनसम्बन्धी व्यवस्था छ । ‘बैठकमा मन्त्रीको उपस्थिति अनिवार्य हुनु पर्नेछ र कुनै मन्त्रालयसँग सम्बन्धित विषयमा छलफल हुँदा सम्बन्धित मन्त्री समेत अनिवार्य उपस्थित हुनु पर्नेछ’ नियमावलीको नियम ६ को उपनियम ५ मा छ ।
