नेपालगञ्ज म्याराथनसँग वन स्टेप फाउन्डेसनको सहकार्य

काठमाडौं, ४ चैत । अमेरिकामा सामाजिक कार्य गर्न स्थापित वन स्टेप फाउन्डेसन र नेपालगञ्ज म्याराथनबीच किशोरी खेलाडीलाई दौडमार्फत मूलधारमा ल्याउने सम्बन्धमा सम्झौता भएको छ । समाजमा पिछडिएका र आर्थिक अवस्था कमजोर रहेका मुस्लिम, मधेसी, दलित, जनजाति समुदायका किशोरीलाई दौडमार्फत एउटै मञ्चमा ल्याई उनीहरूलाई सशक्तीकरण गराउन दुई संस्थाबीच सम्झौता भएको हो ।

सम्झौतापत्रमा वन स्टेप फाउन्डेसनका तर्फदेखि बालकृष्ण जोशी र नेपालगञ्ज म्याराथनका तर्फबाट टीएस ठकुरीले हस्ताक्षर गरेका छन् । सम्झौतासँगै वन स्टेप फाउन्डेसनले नेपालगञ्ज म्याराथनमा तीन सय जना किशोरीको दर्ता गरेर सघाउनेछ । ‘यसले समाजमा लुकेका प्रतिभालाई उजागर गर्न सघाउनेछ’, वन स्टेप फाउन्डेसनका संस्थापक सदस्य जोशीले भने, ‘पिछडिएको समुदायका किशोरीलाई मूलधारमा ल्याउनु हामी सबैको जिम्मेवारी र दायित्व हो । नेपालगञ्ज म्याराथनको यो पहलकदमीको हार्दिक सराहना पनि गर्दछु ।’

नेपाली किशोरीको क्षमता र प्रतिभालाई उजागर गर्न अन्तर्राष्ट्रिय सहभागितामा समेत सघाउन आफूहरू तयार रहेको वन स्टेप फाउन्डेसनका संस्थापक सदस्य जोशीले बताए । जोशीले संसारकै शीर्ष ६ मध्येका न्युयोर्क म्याराथन, सिकागो म्याराथन लगायत १५ बढी फुल म्याराथन पूरा गरिसकेका छन् । साथै गत वर्ष विश्वविख्यात एभरेस्ट म्याराथन पनि पूरा गरेका थिए । एक सय बढी हाफ म्याराथन तथा दुईवटा एक सय किलोमिटर दूरीका अल्ट्रा म्याराथन पूरा गरिसकेका छन् ।

अमेरिकामा स्थापित वन स्टेप फाउन्डेसनले स्वास्थ्य, शिक्षा, खेलकुदका साथै सामाजिक काम गर्दछ । सम्झौताअनुसार वन स्टेप फाउन्डेसनले नेपालगञ्जका सेरोफेरोमा अवस्थित विद्यालयमा अध्ययनरत तीन सय जना किशोरीको दर्ता शुल्क नेपालगञ्ज म्याराथनलाई प्रदान गर्नेछ ।

यो सम्झौता सन् २०३० संस्करणसम्मका लागि गरिएको छ । आपसी सहमतिमा हरेक वर्ष सहभागी संख्या क्रमिक बढाउँदै जाने पनि सम्झौतामा उल्लेख छ । यो सम्झौताले नेपालगञ्ज म्याराथनको दायरा अझै फराकिलो हुँदै जाने संस्थापक टीएस ठकुरीले बताए । 'संसारभर रहेका नेपालीलाई यसमा जोड्न यो अवधारणा अगाडि बढाइएको हो', ठकुरीले भने, ­‘विश्वका जुनसुकै देशमा कार्यरत हरेक सामाजिक संघसंस्था वा व्यक्तिले यसमा सहजै सहकार्य गर्न सक्नेछन् ।'

धारा नेपालगञ्ज म्याराथनको ११औँ संस्करण आगामी मंसिर ६ गते शनिबार हुँदै छ । नवौँ धारा नेपालगञ्ज म्याराथनका विजेता गोपीचन्द्र पार्कीले विश्वको शीर्ष ६ भित्र पर्ने लण्डन म्याराथनमा भाग लिइसकेका छन् । यसैगरी दशाैँका विजेतालाई लण्डनलगायत अन्य विश्व प्रतिष्ठित म्याराथनमा सहभागी गराउने तयारी भइरहेको छ । नेपालगञ्ज म्याराथन नेपालबाट एसोसियसन अफ इन्टरनेसनल म्याराथन एण्ड डिस्टेन्स रेस(एम्स)को पहिलो पूर्णकालीन सदस्य हो । एम्सले नेपालगञ्ज म्याराथनका संस्थापक टीएस ठकुरीलाई नेपालका लागि आधिकारिक दुत नियुक्त गरेको छ ।