रवि लामिछानेले भने- राज्य लागेपछि एउटा व्यक्तिको के लाग्दो रहेछ र !
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आज सभामुख देवराज घिमिरेसँग भेटवार्ता गरेका छन् । पार्टीका सांसदहरूसहित घिमिरेलाई भेट्न सिंहदरबार पुगेका लामिछानेले आफ्नो संसद पद निलम्बनबारे कुरा भएको बताए ।
सहकारीको रकम अपचलन प्रकरणमा लामिछानेमाथि कास्की, काठमाडौं, चितवन तथा रुपन्देही अदालतमा मुद्दा विचाराधिन छ । उनीमाथि सम्पत्ती शुद्धीकरणको पनि मुद्दा छ । त्यस्तै, पर्सामा उनको मुद्दामा अनुसन्धान भइरहेको छ । यही प्रकरणमा लामिछानेको संसद पद निलम्बन भएको छ ।
तर, रास्वपाले भने गैरकानुनी रूपमा लामिछानेको संसद पद निलम्बन गरिएको भन्दै विरोध जनाउँदै आएको छ । यही क्रममा लामिछाने पार्टीका सांसदहरू लिएर सभामुखलाई भेट्न पुगेका हुन् ।
सभामुखलाई भेटेर बाहिरिने क्रममा लामिछानेले आफ्नो निलम्बन फुकुवाबारे कुराकानी भएको बताए । सांसदबाट कसरी निलम्बन गर्न सकिन्छ भनेर दूषित मनासाय राखेर अदालतको ढोकामा मात्र पुर्‍याइएको मुद्दामा आफूलाई निलम्बन गरिएको उनको भनाइ छ ।
आफूले भनेका कुरामा सभामुख पनि गम्भीर बनेको लामिछानेको भनाइ छ । 'यसले भोलि प्रतिशोधको रूप लिन्छ । निलम्बनलाई हतियारको रूपमा प्रयोग हुन सक्छ भन्ने कुरा उहाँ (सभामुख घिमिरे) लाई भनेँ,' लामिछानेले भने, 'उहाँ पनि चिन्तित हुनुभयो ।'
अदालतको आदेशमा धरौटी बुझाएर थुनामुक्त भएपछि लामो समय मौनजस्तै देखिए पनि अहिले नै किन अगाडि आउनुभयो ? भन्ने प्रश्नमा लामिछानेले भने, 'म कानुनी प्रक्रिया टुंग्याएर अगाडि आउन चाहेको थिएँ । तर, सरकारले त्यसलाई हतियारको रूपमा प्रयोग गर्न लागेपछि, लम्ब्याएको लम्ब्यायै गरेपछि अहिले बाहिर आएको हुँ ।'
अब तपाईंको मुद्दा के हुन्छ ? यो प्रक्रिया कसरी अघि बढ्छ भन्ने प्रश्नमा उनले भने- 'राज्य लागेपछि एउटा व्यक्तिको के लाग्दो रहेछ र !'
