ब्राड हजले भने– अलराउन्डर दीपेन्द्रको खेल म्याक्सवेलको जस्तै लाग्छ

 काठमाडौं,२४ मंसिर। एनपीएल टिम सुदूरपश्चिम रोयल्सका मेन्टर तथा अस्ट्रेलियाका लिजेन्ड ब्राड हजले सुदूरका कप्तान दीपेन्द्रको खेल म्याक्सवेलको जस्तो लाग्ने गरेको बताएका छन् । 

आइतबारको खेलपछि सञ्चारकर्मीसँग संवाद गर्दै उनले यस्तो बताएका हुन् । ‘दीपेन्द्र एकदम राम्रो खेलाडी हुन्, उनको ब्याटिङ बलिङ र फिल्डिङ सबै उत्तिकै राम्रो छ । कहिलेकाहीँ उनको शटहरू देख्दा ग्लेन म्याक्सवेलको जस्तै लाग्छ’ उनले भने ।

दीपेन्द्रको प्रदर्शनले उनले आइपीएल, बीबीएलजस्ता विश्वचर्चित लिग खेल्ने कुरामा पनि आफूहरू विश्वस्त रहेको उल्लेख गर्दै ब्राड हजले नेपालमा धेरै युवा प्रतिभाहरू भएको र यसले नेपाली क्रिकेटको भविष्य राम्रो बनाउने कुरा पनि बताए । 

नेपाली क्रिकेटले नयाँ उचाइ कायम गरिरहेको कुरा निकै राम्रो रहेको भन्दै उनले नेपालले आगामी वर्षहरूमा पनि टी-२० विश्वकपजस्ता प्रतियोगिताहरू खेल्ने विश्वास समेत प्रकट गरे । 

उनले सुदूरपश्चिमले एनपीएलको उपाधि जित्न सक्ने पनि बताए । सुदूरपश्चिम हिजोको खेलमा भने हराएको थियो । ब्राड हज आज (सोमबार) स्वदेश फिर्ता हुँदैछन् ।