सारफीको नेतृत्व राष्ट्र बैंकमा हस्तान्तरण, गभर्नर अधिकारी अध्यक्ष चयन
काठमाडौं, भदौ १९
साउथ एशिया रिजन फाइनान्सियल इन्कुल्सन इनिसियटिभ (सारफी) को नेतृत्व राष्ट्र बैंकमा हस्तान्तरण भएको छ । नेतृत्व हस्तान्तरण सँगै बैंकका तर्फबाट गभर्नर महाप्रसाद अधिकारी सारफीको अध्यक्ष चयन हुनुभएको छ ।
मध्य अमेरिकी मलुक एल्साल्भाडोरको राजधानी सान्सात्भाडोरमा २ सेप्टेम्बर, २०२४ देखि जारी एलायन्स फर फाईनान्सियल इन्क्लुजन (एएफआई) ग्लोवल पोलिसी फोरमको बैठक चलिरहेको छ । सो बैठकका का क्रममा सारफीको अध्यक्षता नेपाल राष्ट्र बैंकमा हस्तान्तण भएको हो । सो अवसरमा गभर्नर अधिकारी भर्चुअल माध्यमबाट सहभागी भई बैठकको अध्यक्षता ग्रहण गर्नुभयो ।
बैठकले स्टेट बैंक अफ पाकिस्तान (एसबिपी) लाई सारफीको उपाध्यक्ष चयन गरेको छ । यसअघि सारफीको नेतृत्व माल्दिभ्स मनिटरी अथोरिटीमा थियो भने राष्ट्र बैंकका तर्फबाट गभर्नर अधिकारी उक्त सञ्जालको उपाध्यक्ष हुनुहुन्थ्यो ।
सन् २०२२ सेप्टेम्बरमा जोर्डनको डेड सीमा सम्पन्न ग्लोवल पोलिसी फोरमको १२ औं बैठकका क्रममा सारफी स्थापना भएको थियो । नेपाल राष्ट्र बैंकसहित बङ्गलादेश, भुटान, माल्दिभ्स, पाकिस्तान र श्रीलङ्काका केन्द्रीय बैंकहरू उक्त सञ्जालमा आबद्ध छन् । क्षेत्रीयस्तरमा ज्ञान आदानप्रदान, क्षमता अभिवृद्धि र संयुक्त सिकाइ अभ्यास, प्राविधिक सहायताको कार्यान्वयन, विश्वव्यापी क्षेत्रीयस्तरका असल अभ्यासको अनुसरण गर्दै सबै वित्तीय समावेशीकरणलाई प्रवर्द्धन गर्नेलगायतका उद्देश्य सारफी स्थापना गरिएको थियो ।
