स्पेनमा गोदाम विस्फोटमा ३ जनाको मृत्यु

काठमाडौं, एजेन्सी । स्पेनको दक्षिणपूर्वी शहर इबीमा रहेको एउटा कारखानामा बुधवार भएको विष्फोटमा परी तीन जनाको मृत्यु भएको छ भने तीन जना गम्भीर घाइते भएका छन् ।

भ्यालेन्सिया क्षेत्रका लागि स्पेनी सरकारी प्रतिनिधि पिलार बर्नाबेले एलिसेन्टेबाट करिव ३५ किलोमिटर टाढा इबीको इन्डस्ट्रियास क्लाइम्बर कारखानामा भएको विस्फोटमा मृत्यु भएको पुष्टि गरेका छन् ।

बेर्नाबेले विष्फोट हुँदा भवनको छाना र पर्खालको केही भाग भत्किएको र धेरै मानिस भग्नावशेषमा फसेको बेला भवनमा ३९ जना रहेको बताए ।

मृतकका साथै, विस्फोटबाट तीन जना गम्भीर घाइते भएका छन् र उनीहरूलाई नजिकैको एलिसेन्टे, भ्यालेन्सिया र अल्कोयका अस्पतालहरूमा लगिएको छ । विस्फोटमा परी थप तीन जना सामान्य घाइते भएका छन् ।

अधिकारीहरूले विस्फोटको कारणको लागि अनुसन्धान शुरु भएको बताएका छन् ।