आगलागीबाट विभिन्न धनमाल जलेर नष्ट

काठमाडौं, बैशाख १४ 

संखुवासभाको चैनपुर नगरपालिका–२ तिखिढुङ्गा बस्ने झलक बहादुर अधिकारीको घरमा गएराति आगलागी हुँदा अन्नपात, भाँडावर्तन, लत्ताकपडा लगायत विभिन्न सामान र चौपाया समेत जलेर करिब ८ लाख रूपैयाँ बराबरको धनमाल नष्ट भएको छ ।

यसैगरी संखुवासभाको मकालु गाउँपालिका–५ खोप्ताक पाठागाउँ बस्नेआ ४४ वर्षीय भिम लाल तामाङको घरमा विद्युत सर्ट भई शुक्रबार बिहान आगलागी हुँदा नगद ८० हजार रूपैयाँ, सुनचाँदी, अन्नवपात लत्ताकपडा लगायतका विभिन्न सामानहरू जलेर करिब ११ लाख ३९ हजार ५ सय रूपैयाँ बराबरको धनमाल नष्ट भएको छ । साथै आगो निभाउने क्रममा घाइते भएकी भिम लालकी श्रीमतीलाई उपचारको लागि प्राथमिक स्वास्थ्य केन्द्र नुममा पठाइएको छ ।

नुवाकोटको सूर्यगढी गाउँपालिका–३ भुन्टेस्थित चतुरमाला सामुदायिक वनमा गएराति लागेको आगो फैलिएर सोही ठाउँ बस्ने तेज बहादुर तामाङको घरमा समेत आगलागी हुँदा अन्नपात, लत्ताकपडा तथा आँगनमा रहेको बा.५७ प ५३९६ नम्बरको मोटरसाइकल जलेर करिब ८ लाख रूपैयाँ बराबरको धनमाल नष्ट भएको छ । 

ईलामको ईलाम नगरपालिका–११ निन्दाखु टोल बस्ने उमराम खनालको घरमा शुक्रबार बिहान आगलागी हुँदा २ तोला सुन, ४ तोला चाँदी, अन्नपात, भाँडावर्तन, लत्ताकपडा लगायतका विभिन्न सामानहरू जलेर करिब ८ लाख रूपैयाँ बराबरको धनमाल नष्ट भएको छ । प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको छ ।