रवि लामिछानेलाई म्याद थपका लागि कास्की अदालतमा उपस्थित गराइयो
पोखरा ४, कात्तिक। सहकारी ठगी प्रकरणमा पक्राउ परेका पूर्वगृमन्त्री तथा राष्ट्रिय स्वतन्त्र पार्टी सभापति रवि लामिछानेलाई जिल्ला अदालत कास्कीमा उपस्थित गराइएको छ ।
सूर्यदर्शन बचत तथा ऋण सहकारी संस्था लिमिटेड पोखराको सहकारी ठगी तथा सङ्गठित अपराधसम्बन्धी मुद्दा सम्बन्धमा अनुसन्धानका लागि लामिछानेलाई अदालत उपस्थित गराइएको हो ।
शुक्रबार काठमाडौंस्थित पार्टी कार्यालयबाटै गिरफ्तार भएका उनलाई सोही दिन राति नै पोखरा ल्याइएको थियो ।
पोखरा स्वास्थ्य विज्ञान प्रतिष्ठानमा स्वास्थ्य परीक्षण गरी लामिछानेलाई शनिबार बिहान जिल्ला प्रहरी कार्यालय कास्कीमा लगिएको थियो ।
हिजो (शनिबार) सार्वजनिक बिदा परेकाले आज (आइतबार) मात्रै अदालतमा उपस्थित गराइएको हो । लामिछानेका समर्थक र सहकारी पीडित दुवै पक्ष अदालत बाहिर जम्मा भएका छन् ।
लामिछाने समर्थकले सहिद चोक र सहकारी पीडितहरुले राष्ट्र बैंक चोकमा बेग्लाबेग्लै भेला बोलाए पनि जिल्ला प्रशासनले निषेधाज्ञा जारी गरेको छ ।
