विश्वकप क्रिकेट लिग-२ : स्कटल्याण्डसँग प्रतिस्पर्धा गर्दै नेपाल
काठमाडौं, १९ कात्तिक । आईसीसी क्रिकेट विश्वकप लिग टु अन्तर्गत अमेरिकामा जारी सिरिजमा नेपालले आज आफ्नो चौथो तथा अन्तिम खेल स्कटल्याण्डसँग प्रतिस्पर्धा गर्दैछ ।
नेपाल र स्कटल्याण्डबीचको खेल डालासस्थित ग्राण्ड प्रेरी स्टेडियममा नेपाली समय अनुसार राति सवा ९ बजे सुरु हुनेछ ।
यसअघिको पहिलो खेल ५ विकेटले स्कटल्याण्डविरुद्ध जित निकालेको नेपाल त्यो प्रदर्शनलाई यथावत् राख्न चाहन्छ । तर, घरेलु टोली अमेरिकाविरुद्धको दुवै खेलमा पराजित भएको नेपाल दबाबमा छ ।
यसअघि, नेपालले १५४ रनमा अलआउट गर्दै २९.५ ओभरमा १५७ रन बनाउँदै स्कटल्याण्डमाथि जित निकालेको थियो । अमेरिकाविरुद्ध पहिलो खेलमा ३ विकेटले हारेको नेपाल दोस्रो खेलमा ३७ रनले पराजित भएको थियो ।
स्कटल्याण्डले भने अमेरिकालाई दुवै खेलमा हराएको थियो । लिग टु को यस सिजनमा स्कटल्याण्ड र अमेरिकाले २-२ खेल जितेर समान ४ अंक जोडेका छन् ।
नेपालले भने ३ खेलबाट २ अंक मात्र जोडेको छ । अब सिरिजको अन्तिम खेलमा जित निकाल्दै सुखद रुपमा अमेरिका टुर सकाउने योजनामा नेपाल छ ।
