अमेरिकामा डोनाल्ड ट्रम्प राष्ट्रपति बन्ने पक्का
काठमाडौं, २१ कात्तिक । अमेरिकाको राष्ट्रपति चुनावमा रिपब्लिकन उम्मेदवार डोनाल्ड ट्रम्पको जित पक्कापक्की भएको छ । डेमोक्रेटिक उम्मेदवार कमला ह्यारिसलाई उछिन्दै ट्रम्प दोस्रोपटक राष्ट्रपति बन्ने पक्का भएको हो ।
सात स्वीङ स्टेटमध्ये फ्लोरिडा, नर्थ क्यारोलिना र पेन्सलभेनियामा जितेका ट्रम्प अन्य राज्यको मतगणनामा पनि ठूलो मतान्तरले अगाडि देखिएका छन् ।
ट्रम्प सन् २०१६ मा पहिलोपटक राष्ट्रपति निर्वाचित भएका थिए। सन् २०२० को निर्वाचनमा पनि उनले प्रतिस्पर्धा गरेका थिए । तर उनी डेमोक्रेटिक उम्मेदवार जो बाइडनसँग हारेका थिए ।
यसपटक राष्ट्रपति निर्वाचन मात्र होइन तल्लो र माथिल्लो दुवै सदनमा रिपब्लिकन पार्टीले आफ्नो कब्जा कायम गर्ने पक्का भएको छ ।
जित पक्का भएपछि ट्रम्पले फ्लोरिडास्थित चुनावी अभियानको मुख्यालयमा जम्मा भएका आफ्ना समर्थकलाई सम्बोधन गर्दै आफ्नो कार्यकाल 'स्वर्णयुग' सरह हुने दाबी समेत गरेका छन् ।
अमेरिकी राष्ट्रपतिको कार्यकाल चार वर्षको हुने गर्दछ ।
