नेपालले थाइल्यान्डलाई दियो १४० रनको लक्ष्य

काठमाडौं, २५ कात्तिक। आईसीसी यू–१९ महिला टी–२० विश्वकप एसिया छनोटमा नेपालले आफ्नो चौथो खेलमा थाइल्याण्डविरुद्ध खेलिरहेको छ। जारी खेलमा नेपालले थाइल्याण्डसमक्ष १ सय ४० रनको जितका लागि लक्ष्य पेश गरेको छ ।

टस जितेर पहिले ब्याटिङ गरेको नेपालले २० ओभरमा ९ विकेट गुमाएर १३९ रनको योगफल तय गरेको हो ।

नेपालका लागि ओपनर सना प्रवीणले ४६ बलमा ७ चौकासहित सर्वाधिक ५३ रनको अर्धशतकीय पारी खेलिन्।
त्यस्तै, अर्का ‍ओपनर साबित्री धामीले २८ रन बनाइन् ।

सोनी पाख्रिनले १९ रन बनाउँदा अन्यले दोहोरो अंकमा रन जोड्न सकेनन् ।  १३ औं ओभरमा खेल्दासम्म ८८–० को अवस्थामा रहेको नेपालले त्यसपछि निरन्तर विकेट गुमाउँदै ५१ रन जोड्दा ९ विकेट गुमायो ।

थाइल्याण्डका लागि नथारिका ठोकोइले ४ ओभरमा ३१ रन दिएर ३ विकेट लिइन् । त्यस्तै, केसिनी कैजुम्फोलले २ तथा कोरानित सुवाञ्चोनराथीले १ विकेट झारिन् ।