देउती बज्यै मन्दिरकी पुजारी मृत फेला

काठमाडौं, २८ कात्तिक । सुर्खेतको देउतीबज्यै मन्दिरकी पुजारी मृतअवस्थामा भेटिएकी छन् ।

पुजारी सरस्वती राजी आज (बधुवार) बिहान मन्दिरको मूल ढोकामा घाँटीमा पासो लागेको अवस्थामा मृत फेला परेकी हुन् ।

आज बिहान ५ः४५ बजे पुजारी मृत फेला परेको जानकारी स्थानीयले दिएका जिल्ला प्रहरी कार्यालय सुर्खेतका इन्सपेक्टर अजय डाँगीले बताए । त्यसपछि प्रहरी टोली पुगेर मुचुल्का उठाएको उनले जानकारी दिए ।  ​​​​​​​​​​​

इन्सपेक्टर डाँगीका अनुसार उनको शव पोष्टमार्टमका लागि पठाइएको र अनुसन्धान भइरहेको छ । ‘अहिलेसम्म शंकास्पद केही देखिएको छैन । मृत्युको कारण पोष्टमार्टम रिपोर्टपछि थाहा होला ।’ उनले भने ।