सुर्खेतमा स्कुल बसको ठक्करबाट बालिकाको मृत्यु
सुर्खेत, ३० कात्तिक । स्कुल बसको ठक्करबाट सुर्खेतमा एक बालिकाको ज्यान गएको छ ।
आज (शुक्रबार) बिहान वीरेन्द्रनगर नगरपालिका–१, त्रिपुरेश्वरमा सनसाइन एकेडेमी स्कुलको बसले ठक्कर दिँदा बालिकाको निधन भएको हो ।
जिल्ला प्रहरी कार्यालय सुर्खेतका प्रवक्ता एवम् डिएसपी वीरेन्द्रवीर विश्वकर्माले बसको ठक्करबाट सोही ठाउँकी अन्दाजी ५ वर्षीय समीक्षा सुनारको मृत्यु भएको पुष्टि गरे ।
कर्णाली प्रदेश ०२००१ क ००६८ नम्बरको सनसाइन एकेडेमी बोर्डिङ स्कुलको बसले बालिकालाई ठक्कर दिँदा समीक्षाको घटनास्थलमै मृत्यु भएको प्रहरी भनाइ छ ।
बस चालक र गाडीलाई नियन्त्रणमा लिइएको प्रहरीले जनाएको छ । बालिकाको शव घटनास्थलमै छ भने जिल्ला प्रहरी कार्यालयबाट डिएसपी नेतृत्वको टोली घटनास्थलमाा परिचालन गरिएको छ ।
उक्त घटनाबारे थप विवरण आउन बाँकी रहेको सुर्खेत प्रहरीले जनाएको छ ।
