निर्मला पन्त हत्या प्रकरण: प्रत्यक्षदर्शी भन्दै अन्तर्वार्ता दिएका व्यक्ति पक्राउ
काठमाडौं, २८ कात्तिक । कञ्चनपुरको निर्मला पन्त हत्या प्रकरणमा आफू प्रत्यक्षदर्शी भएको बताउँदै अन्तर्वार्ता दिएका एक व्यक्ति पक्राउ परेका छन् । पक्राउ पर्नेमा गोरखाका नवराज अर्याल छन् ।
केन्द्रीय अनुसन्धान ब्यूरो (सीआईबी) को टोलीले पक्राउ गरेको एसपी होविन्द्र बोगटीले जानकारी दिए । गलत विवरणसहित दुष्प्रचार गरेको आरोपमा उनलाई हिरासतमा राखिएको प्रहरीले जनाएको छ ।
‘उनले टेलिभिजनमा दाबी गरेका सबै विवरण झुठा हो, त्यो विषयमा सोधपुछका लागि ल्याएका हौं ।’, एसपी बोगटीले भने ।
उनले आफूलाई खानेपानी विभागको सवारी चालकका रुपमा चिनाएका थिए । त्यसक्रममा कञ्चनपुर पुगेको बेला निर्मलाको बलात्कार हुँदै गरेको देखेको विवरण उनले अन्तर्वार्तामा उनले सुनाएका थिए ।
