प्रधानमन्त्रीको भ्रमणको तयारीका लागि आज चीन जाँदै परराष्ट्रमन्त्री राणा

काठमाडौं, १३ मंसिर । परराष्ट्रमन्त्री आरजु राणा देउवा आज चीन भ्रमणमा जाँदैछिन् । १७ मंसिरमा प्रधानमन्त्री केपी शर्मा ओली चीन भ्रमणमा जाने तयारीका लागि परराष्ट्रमन्त्री राणा आजै चीन जान लागेकी हुन् ।

आज दिउँसो १२ बजेर २० मिनेटको उडानबाट उनी सिचुआन प्रान्तको राजधानी छेङ्दु प्रस्थान गर्दैछिन् ।

मन्त्री राणाले शुक्रबार (मंसिर १४) चिनियाँ विदेशमन्त्री वाङ यीसँग छेङ्दुमै भेटवार्ता गर्ने तय भएको छ । स्रोतका अनुसार, चिनियाँ विदेशमन्त्री पनि छेङ्दुमा आयोजित एक कार्यक्रममा आउने र दुई समकक्षीबीच छेङ्दुमै भेटवार्ता हुने कार्यक्रम छ । 

भेटमा प्रधानमन्त्रीको भ्रमण दुई देशको आपसी हितका विविध विषयमा छलफल हुने परराष्ट्र मन्त्रालयले जनाएको छ । 

प्रधानमन्त्री केपी शर्मा ओली ४० सदस्यीय टोलीको नेतृत्व गर्दै मंसिर १७ गते चीन भ्रमणमा जाँदैछन् । परराष्ट्रमन्त्री राणा सोही भ्रमणको तयारीका लागि आजै चीन जान लागेकी हुन् । प्रधानमन्त्री ओलीको भ्रमण दलमा पनि उनले सहभागिता जनाउँनेछिन् ।