रवि लामिछानेको म्याद तेस्रो पटक थपियो, थप १० दिन हिरासतमा राख्न अनुमति
काठमाडौं, २० कात्तिक । सहकारी अनियमितता प्रकरणमा पक्राउ परेका रवि लामिछानेमाथि अनुसन्धान गर्न अदालतले थप १० दिन म्याद थपेको छ ।
१५ कात्तिकमा दोस्रोपटक थपिएको म्याद सकिएको थियो । सूचना अधिकारी सुरज अधिकारीले सोही दिनदेखि गणना हुने गरी म्याद थप भएको जानकारी दिए ।
न्यायाधीश चन्द्रकान्त पौडेलको इजलासले लामिछानेमाथि अनुसन्धान गर्न म्याद थप्न अनुमति दिएको हो । प्रहरीले भने अनुसन्धानका लागि २५ दिनको समय माग गरेको थियो ।
कात्तिक २ गते काठमाडौंबाट लामिछाने पक्राउ परेका थिए । त्यहीँ दिन राति नै पोखरा लगिए पनि शनिबार परेकाले ४ गतेमात्रै अदालतमा हाजिर गराइएको थियो । अदालतले त्यसबेला पहिलो पटकका लागि पक्राउ परेको दिनदेखि गणना हुने गरी ७ दिन म्याद थप गरेको थियो ।
