गृहमन्त्रीको टिप्पणी- रवि लामिछानेलाई रहरले नभइ अनुसन्धानका लागि ठाउँ-ठाउँ घुमाइएको हो

काठमाडौं, ४ पुस । गृहमन्त्री रमेश लेखकले पूर्वगृहमन्त्री रवि लामिछानेलाई रहरले ठाउँठाउँ नघुमाइएको बताएका छन्।

बुधबार पाल्पाको रामपुरमा नवनिर्मित इलाका प्रशासन कार्यालय भवनको उद्घाटन गर्दै उनले लामिछानेलाई रहरले नभइ अनुसन्धानका लागि ठाउँठाउँ घुमाइएको बताएका हुन्।

‘जतिसुकै ठूलो मान्छे भए पनि अनुसन्धान हुन्छ। सबैमाथि अनुसन्धान हुन्छ। सरकारले भ्रष्टाचार नियन्त्रण गरेर सुशासन कायम गर्न लागि परेको छ। त्यहीअनुसार अनुसन्धान भइरहेको छ।’ गृहमन्त्री लेखकले भने ।

राष्ट्रिय एजेन्डालाई सम्बोधन गर्न दुई ठूला दल नेपाली कांग्रेस र एमाले मिलेको उल्लेख गर्दै उनले दिगो शान्ति, विकास र सुशासन कायम गर्न वर्तमान सरकार बनेको बताए। कांग्रेस र एमाले मिल्दा सबै क्षेत्रमा आत्मविश्वास बढेको र संक्रमणकालीन न्यायको विषयलाई टुंग्याउने गृहकार्यमा सरकार लागि परेको उनको भनाइ छ।

गृहमन्त्री लेखकेले कालिगण्डकी करिडोरले पाल्पाको रामपुरको ठूलो सम्भावना रहेको उल्लेख गरे। उनले चीन र भारतलाई जोड्ने बाटोमा रामपुर रहेको बताउँदै यसको सुन्दर भविष्य र सम्भावना रहेको जिकिर गरे।

प्रधानमन्त्री केपी शर्माले सहजरूपमा नागरिकलाई सेवा प्रवाह गर्न आफूहरूलाई निर्देशन दिएको उनको भनाइ छ।