चितवनका पत्रकारमाथि आक्रमण गर्ने एक पक्राउ

काठमाडौं, ५ पुस । चितवनमा पत्रकारमाथि आक्रमण भएको घटनामा संलग्न भएको अभियोगमा एक जना पक्राउ परेका छन् ।

पक्राउ पर्नेमा भरतपुरकै दीपक सेडाईं छन् ।  बिहीबार राति उनलाई नियन्त्रणमा लिइएको जिल्ला प्रहरी कार्यालय चितवनका डीएसपी भेषराज रिजालले बताए ।

उनी राष्ट्रिय स्वतन्त्र पार्टी (रास्वपा) निकटतम भएको बताइएको छ । सहकारीको रकम हिनामिना प्रकरणमा बयानका लागि रास्वपाका सभापति तथा पूर्वगृहमन्त्री रवि लामिछानेलाई १८ मंसिरका चितवन लगिएको थियो ।

त्यसक्रममा चितवनमा उनका समर्थकहरुले प्रदर्शन गरेका थिए । त्यतिबेला रिपोर्टिङमा खटिएका पत्रकार सन्तोष देउजामाथि आक्रमण भएको थियो । देउजा कपुरबोट मिडियाका सञ्चालक पनि हुन् । 

उक्त घटनामा संलग्न अन्यको पनि खोजी कार्य भइरहेको प्रहरीले जनाएको छ ।