एनपिएल विजेता जनकपुरलाई राष्ट्रपतिको बधाई

काठमाडौँ, पुस ६ गते। राष्ट्रपति रामचन्द्र पौडेलले पहिलो संस्करणको नेपाल प्रिमियर लिग (एनपिएल) को उपाधि जित्न सफल जनकपुर बोल्ट्सलाई बधाई दिएका छन् ।

साथै उनले प्रतियोगितामा सहभागी सबैलाई शुभकामना दिँदै आगामी संस्करणहरूमा अझ राम्रो गर्ने विश्वास व्यक्त गरेका छन् ।

शनिबार दिउँसो कीर्तिपुरस्थित त्रिवि क्रिकेट मैदानमा भएको फाइनलमा सुदूरपश्चिम रोयल्सलाई पाँच विकेटले पराजित गर्दै जनकपुरले एनपिएल पहिलो सिजनको उपाधि जितेको हो।

प्रतियोगितमा सुदूरपश्चिम उपविजेता बन्दा कर्णाली तेस्रो र चितवन चौथो बनेका छन्।