एनपीएलमा सट्टेबाजी गर्ने २ भारतीय पक्राउ

काठमाडौं, ७ पुस । नेपाल प्रिमियर लिग (एनपीएल) मा  सट्टेबाजी गरेको आरोपमा दुई भारतीय नागरिक पक्राउ परेका छन् ।

भारतको उत्तरप्रदेश आग्रा सिकान्द्रा पञ्चायत घर भइ टोखा ग्राण्डी बस्ने ४७ वर्षीय हरिस जावा र सोही ठाउँ घर भएका ३८ वर्षीय ऋषि मातन पक्राउ परेका छन् ।

आइतबार उनीहरूलाई जिल्ला प्रहरी परिसर  काठमाडौंबाट खटिएको टोलीले पक्राउ  गरेको हो ।

एनपीएलमा सट्टेबाजी खेलाएको आरोप  उनीहरूमाथि लागेको छ । उनीहरूका  साथबाट  प्रहरीले ५ थान मोबाइल, १ थान ल्यापटप, ८ थान सीम, राहदानी, आधार कार्ड, भोटिङ कार्ड  समेत बरामद गरेको छ ।

सट्टेबाजी खेलाउन नहुने कसुरमा पक्राउ परेकाहरूविरुद्ध कारबाही  गरिने प्रहरीले  जनाएको छ ।