माओवादीले बोलायो पदाधिकारी बैठक, अखिल क्रान्तिकारीको मतदान विवादबारे छलफल हुने

काठमाडौं, १४ पुस। नेकपा माओवादी केन्द्रले पदाधिकारी बैठक डाँकेको  छ । माओवादीले विद्यार्थी संगठन अखिल क्रान्तिकारीको उमेरहद सम्बन्धी मतगणनामा भएको विवाद मिलाउन पदाधिकारी बैठक बोलाएको हो ।  

आइतबार दिउँसो ३ बजे पार्टी अध्यक्ष पुष्पकमल दाहाल प्रचण्ड निवास खुमलटारमा पदाधिकारीको बैठक बस्नेगरी आह्वान गरिएको छ । नेताहरूका अनुसार उक्त बैठकले अखिल क्रान्तिकारीमा उमेर हद ३२ वर्ष राख्ने कि नराख्ने विषयमा भएको मतगणनामा विवाद भएको छ ।

नेताहरूका अनुसार, कुल दुई हजार ४२८ मध्ये एक हजार ८ सय मत खसेको र त्यसको मतगणना लगभग सकिएको छ । ३२ वर्षे उमेर हद राख्नुपर्ने र राख्न नहुने पक्षमा जम्मा पाँच मतको अन्तर रहेको छ ।

यही बेला मतगणनामा विवाद भएपछि मतगणना नै स्थगित गरिएको छ । यो विषयमा विवाद चर्किन थालेपछि पार्टीको पदाधिकारी बैठक नै बसेर छलफल गर्न लागिएको हो ।

यद्यपी, आगामी केन्द्रीय समितिको बैठकको तयारीका लागि पदाधिकारी बैठक बस्न लागिएको माओवादीको केन्द्रीय कार्यालयका सचिव डोरप्रसाद उपाध्यायको भनाइ छ ।

माओवादीको केन्द्रीय समितिको बैठक यही पुस २१ गते बस्ने बताइएको छ ।