नयाँ इलेक्ट्रीक एसयूभी नेपाल ल्याउँदै सिप्रदी, फागुन पहिलो सातादेखि बिक्री गर्ने तयारी
काठमाडौं, १३ माघ । नेपालका लागि टाटा मोटर्सको एक मात्र आधिकारीक बिक्रेता सिप्रदी ट्रेडिङ प्रा.लि.ले फागुन पहिलो साताबाट नयाँ इलेक्ट्रीक एसयूभी बिक्री सुरु गर्ने भएको छ ।
कम्प्याक्ट एसयूभी सेग्मेन्टमा उपलब्ध कर्भ कुप्पे एसयूभी बिक्री थाल्ने कम्पनीले जनाएको हो ।
भारतमा ६ महिना अगाडि नै लन्च भएको कर्भ इलेक्ट्रीक एसयूभी कम्पनीले ढिलोगरी नेपाल ल्याउन लागेको हो । सिप्रदीले सेप्टेम्बरमा पन्च ईभी नेपाल ल्याएको कारण पनि कर्भ ईभी ल्याउन केही ढिलाई गरेको हो ।
सिप्रदी स्रोतका अनुसार, नयाँ मोडल ल्याउने तयारी अन्तिम चरणमा पुगेको छ । फेब्रुअरी दोस्रो सातासम्म बिक्री सुरु गर्ने तयारी भइरहेको छ । त्यसको लागि आवश्यक तयारी भइरहेको कम्पनीको दाबी छ ।
कम्पनीले ल्याउने नयाँ कर्भ ईभीले बजारमा रहेका कम्प्याक्ट एसयूभी सेग्मेन्टका सबै मोडलसँग सिधा प्रतिस्पार्धा गर्नेछ । सबैभन्दा ठूलो बजार हिस्सा रहेको सेग्मेन्टमा सिप्रदीले कर्भलाई उतार्न लागेको बताइएको छ ।
यस्ता छन् विशेषताहरु :
टाटा मोटर्सले आफ्नो पहिलो कुप्पे डिजाइन एसयूभी कर्भलाई भारतमा दुई ब्याट्री अप्सनमा बिक्री गर्दै आएको छ । कर्भको मिड रेन्ज मोडल एमआरमा ४५ र लङ रेन्ज मोडल ५५ किलोवाट आवरको ब्याट्री प्याकमा उपलब्ध छ ।
एआरएआईका अनुसार मिड रेन्ज मोडलले सिंगल चार्जमा ५०२ किलोमिटर र लङ रेन्ज मोडलले ५८५ किलोमिटर रेन्ज दिने प्रमाणित गरेको छ । तर, यी दुबै मोडलको वास्तविक सडकमा आउने रेन्ज भने कम हुनेछ । टाटा मोटर्सले भने कर्भ ईभीको ४५ र ५५ किलोवाट आवर क्षमताको ब्याट्रीले क्रमशः ३४० र ४०० किलोमिटरसम्म रेन्ज दिने दावी छ ।
सिप्रदीले कुन ब्याट्री अप्सनमा कर्भ ईभी ल्याउँछ भन्ने एकिन जानकारी दिएको छैन । तर, दुबै ब्याट्री अप्सनमा कर्भ आउने अनुमान गर्न सकिन्छ ।
टाटाले कर्भ ईभीमा ब्याट्री जस्तै मोटर पनि फरक साइजमा उपलब्ध गराएको छ । भारतीय बजारमा ५५ किलोवाट आवरको ब्याट्री प्याकसँग १२५ किलोवाट मोटर दिएर बिक्री गर्दै आएको छ । जबकी सानो ४५ किलोवाट अवारको ब्याट्रीसँग ११२ किलोवाट क्षमताको मोटर दिएको छ ।
नेपाल सरकारले मोटर पावरका आधारमा कर लगाएको कारण अधिकांश कम्पनीले मोटर पावर घटाएर ल्याउँदै आएका छन् । यस्तोमा सिप्रदीले पनि ९९ किलोवाट क्षमताको मोटरमा कर्भ ईभी ल्याउने अनुमान गर्न सकिन्छ । त्यसको एकिन जानकारी भने सिप्रदीले अहिलेसम्म दिएको छैन । कर्भ कुप्पे एसयूभीको एक्सेलरेसन पनि उत्कृष्ट छ । यसलाई शून्यबाट १०० किलोमिटरको स्पीड भेट्टाउन ९ सेकेन्ड मात्रै लाग्छ ।
कर्भ ईभीको लम्बाइ ४३१० एमएम, चौडाई १८१० एमएम र उचाइ १६३० एमएम छ । यसमा २५६० एमएम लामो ह्वीलवेस पाउन सकिन्छ । कर्भ ईभीमा १९० एमएम अग्लो ग्राउन्ड क्लियरेन्स पाउन सकिन्छ ।
यसमा १८ इन्चको अलोय दिइएको छ । ५०० लिटरको ठूलो बुट स्पेश रहेको एसयूभीलाई ४५० एमएम गहिरो पानी जमेको स्थानमा पनि सहजै गुडाउन सकिने कम्पनीले जानकारी दिएको छ ।
अत्याधुनिक फिचरहरुले सुसज्जित कर्भ ईभीको इन्टेरियर ह्वाइट र ग्रे गरी दुई कलरमा उपलब्ध छ । ड्यासबोर्डमा नेक्सन ईभीको जस्तै १२.३ इन्चको फ्लोटिङ इन्फोटेन्मेन्ट टचस्कृन, टचवेस क्लाइमेट कन्ट्रोल बटम, ट्रापेजोडियल एसी भेन्ट, फोर स्पोक स्टेरिङ ह्वील, न्याभिगेन सहितको १०.२५ इन्चको डिजिटल इन्स्ट्रुमेन्ट क्लस्टर छन् ।
त्यसैगरी, रोटरी ड्राइभ सेलेक्टर, वायरलेस चार्जिङ प्याड, पानारोमिक शनरुफ, भेन्टीलेटेड सिट, जेबीएल साउण्ड सिस्टम कर्भ ईभीमा पाउन सकिन्छ ।
भारत एनक्याप क्र्यास टेष्टमा ५ स्टार सेफ्टी रेटिङ पाउन सफल कर्भ ईभीमा ६ वटा एयरब्याग, इलेक्ट्रीक पार्किङ ब्रेक, अटो होल्ड, हिल स्टार्ट डिसेन्ट असिस्ट, इएसपी, ड्राइभ डाउजीनेस अलर्ट, व्लाइन्ड स्पट मनिटर, लेभल २ एडास फिचर रहेका छन् ।
