तिहारको बक्स अफिसमा ‘वरिष्ठ बलराम’को दबदबा, दुई करोडभन्दा बढी कमाइ
काठमाडौँ — तिहारको अवसर पारेर प्रदर्शनमा आएका तीन नेपाली फिल्ममध्ये ‘वरिष्ठ बलराम’ ले बक्स अफिसमा उत्कृष्ट सुरुवात गर्दै अग्रस्थान कायम गरेको छ। चलचित्र विकास बोर्डले सार्वजनिक गरेको तथ्यांक अनुसार, शनिबारसम्म यो फिल्मले २ करोड ४८ लाख रुपैयाँ ग्रस कमाइ गरेको छ।
त्यस्तै, ‘मैझारो’ ले सोही अवधिसम्म १ करोड ९५ हजार रुपैयाँ आम्दानी गरेको छ भने ‘सोल्टिनी’ ले २८ लाख ८० हजार रुपैयाँ कमाएको बोर्डले जनाएको छ।
तिहारको छुट्टीलाई लक्षित गर्दै प्रदर्शनमा आएका यी तीन फिल्मबीच रोचक प्रतिस्पर्धा देखिएको छ। विशेषगरी ‘वरिष्ठ बलराम’ ले देशभरका हलहरूमा उच्च ओक्युपेन्सी पाउँदै राम्रो प्रतिक्रिया पाइरहेको छ। बलरामको भूमिकामा देखिएका विनोद न्यौपानेको अभिनय, फिल्मको सामाजिक पृष्ठभूमि र एक्शन मिश्रित कथाले दर्शकको मन जितेको समीक्षकहरूको भनाइ छ।
त्यसैगरी, ‘मैझारो’ ले आफ्नो मौलिक कथा, ग्रामीण परिवेश र पारिवारिक सन्देशका कारण दर्शकको मन जित्ने प्रयास गरेको छ। केही हलहरूमा फिल्म स्थिर व्यापार गरिरहेको बताइएको छ।
‘सोल्टिनी’ ले भने सहर केन्द्रित कथा र आधुनिक प्रेमकथालाई प्रस्तुत गर्दै युवा पुस्तालाई लक्षित गरेको छ। सुरुवाती व्यापार अपेक्षाकृत कमजोर भए पनि यसको गीत–संगीत र मुख्य कलाकारहरूको अभिनयले सामाजिक सञ्जालमा चर्चा पाइरहेको छ।
फिल्म विश्लेषकहरूले यी तीनै फिल्मले नेपाली बक्स अफिसमा चहलपहल ल्याएको जनाएका छन्। विशेषगरी ‘वरिष्ठ बलराम’ को प्रदर्शनले दर्शकलाई हलसम्म तान्न सफल भएको र यसले वर्षको सफल फिल्मको सूचीमा स्थान बनाउन सक्ने सम्भावना रहेको अनुमान गरिएको छ।
