मलेसियामा डुङ्गा दुर्घटना : हालसम्म २१ जनाको मृत्यु, दर्जनौँ बेपत्ता
क्वाललम्पुर । अवैध आप्रवासीहरू बोकेको एक डुङ्गा मलेसियाको रिसोर्ट टापु लाङ्कावी नजिकै डुबेपछि कम्तीमा २१ जनाको मृत्यु भएको पुष्टि भएको छ। यो क्षेत्र थाइल्यान्डको सीमा नजिक पर्छ।
तेस्रो दिन पनि खोजी तथा उद्धार कार्य जारी छ। हालसम्म १३ जनाको उद्धार गरिएको छ तर दर्जनौँ व्यक्ति अझै बेपत्ता छन्। मलेसियाली कोस्ट गार्डले डुङ्गामा करिब ७० जना सवार रहेको अनुमान गरेको छ।
मलेसियाली अधिकारीहरूका अनुसार, डुङ्गामा सवार व्यक्तिहरू दुई हप्ताअघि म्यानमारको गरिब राखाइन राज्यबाट हिँडेका करिब ३०० व्यक्तिहरूमध्ये थिए, जसमा अधिकांश रोहिंग्या थिए। यसैबिच, २३० यात्रु बोकेको अर्को डुङ्गा अझै बेपत्ता रहेको बताइएको छ।
मलेसियाको सामुद्रिक प्राधिकरणले समुद्री सतह र हवाई खोजीसहितको यो उद्धार कार्य सात दिनसम्म चल्ने अपेक्षा गरेको छ। अधिकारीहरूले उद्धार गरिएका शवहरूमध्ये कम्तीमा एक जना बच्चाको रहेको बताएका छन्।
उद्धार गरिएका १३ जनामध्ये ११ जना रोहिंग्या र दुई जना बङ्गलादेशी हुन्। मुख्यतः मुस्लिम समुदायका रोहिंग्याहरू म्यान्मारका धेरै जातीय अल्पसङ्ख्यकहरूमध्ये एक हुन्, तर उनीहरूलाई म्यानमार सरकारले नागरिकता दिन अस्वीकार गरेको छ।
अगस्ट २०१७ यता, म्यानमारको सेनाले गरेको घातक कारबाहीका कारण लाखौँ रोहिंग्याहरू सीमा पार गरी बङ्गलादेश भागेका थिए। तर, बङ्गलादेशमा पनि द्वन्द्व र खराब जीवन अवस्थाका कारण केही रोहिंग्याहरूले क्षेत्रमा सुरक्षित आश्रयस्थल मानेको मुस्लिम राष्ट्र मलेसियातर्फ भिडभाडयुक्त डुङ्गामा जोखिमपूर्ण यात्रा गर्ने गरेका छन्।
