मानव बेचबिखन कसुरमा इन्टरपोलबाट रेड नोटिस जारी भएका फरार व्यक्ति कुवेतबाट पक्राउ
काठमाडौं, २० कात्तिक । मानव बेचबिखन तथा ओसारपसार मुद्दामा इन्टरपोलबाट रेड नोटिस जारी भएका व्यक्ति पक्राउ परेका छन् ।
पक्राउ पर्नेमा धनुषा जनकनन्दिनी गाउँपालिका–४ ठेगाना भएका दिलीप राउत रहेका छन् ।
नेशनल सेन्ट्रल ब्यूरो (एनसीबी) कुवेतको समन्वयमा कुवेतमा पक्राउ गरिएका उनलाई सम्बन्धित मुद्दामा कानूनी कारबाही गर्न आज (मंगलबार) नेपाल फिर्ता ल्याइएको छ ।
उनीविरुद्ध गत १८ असोजमा रेड नोटिस जारी गरिएको थियो । नेपाल प्रहरी प्रधान कार्यालय इन्टरपोल शाखाले उनलाई सम्बन्धित कसुर बमोजिम कारबाहीको लागि मानव बेचबिखन अनुसन्धान ब्यूरोबाट खटिएका प्रहरीलाई बुझाइएको जनाएको छ ।
