३९ अंकले बढ्यो सेयर बजार, कारोबार रकम पनि बढ्यो

काठमाडौं, १२ मंसिर । आज (बुधबार) सेयर बजारको परिसूचक नेप्से ३९.७० अंकको वृद्धिपछि २७५६ मा पुगेको छ ।  बजारको परिसूचकसँगै कारोबार रकम समेत बढेको छ । अघिल्लो दिन ७ अर्ब ४५ करोडको कारोबार भएकोमा आज ९ अर्ब ३१ करोडको भयो ।

१९९ कम्पनीको मूल्य बढ्दा ४० को घट्यो भने ५ को स्थिर रह्यो । फाइनान्सबाहेक सबै सेक्टरका सूचक बढे ।
फाइनान्स समूह ०.४७ प्रतिशत घट्यो । व्यापार समूह सबैभन्दा धेरै ९.२ प्रतिशत बढ्यो । यस समूहमा जम्मा दुई कम्पनी विशाल बजार र साल्ट ट्रेडिङ मात्रै सूचीकृत छन् । आज विशाल बजारको मूल्य १० प्रतिशत बढ्दा समग्र सेक्टरलाई बढी प्रभाव पर्यो ।

यस्तै, विकास बैंक समूह ३.१८ प्रतिशत बढ्यो । बैंकिङ ०.३२, होटल तथा पर्यटन १.३६, हाइड्रोपावर १.४६, लगानी ०.७१, जीवन बीमा २.८१, उत्पादन ०.६३, माइक्रोफाइनान्स ०.९०, निर्जीवन बीमा १.१८ र अन्य समूह ०.५६ प्रतिशत बढे ।

यसैगरी, ९ कम्पनीको मूल्य १० प्रतिशत बढ्यो । विशाल बजार कम्पनी, कर्पोरेट डेभलपमेन्ट बैंक, सपोर्ट माइक्रोफाइनान्स, सप्तकोशी विकास बैंक, कर्णाली विकास बैंक, सिन्धु विकास बैंक, मानुषी लघुवित्त, ग्रीन डेभलपमेन्ट बैंक र सुपर मादी हाइड्रोपावर मूल्य १० प्रतिशत बढ्यो ।

मिथिला लघुवित्तको मूल्य १० प्रतिशत घट्यो । नेपाल फाइनान्सको ६.७७, थ्रीस्टार हाइड्रोपावरको ६.५२, जानाकी फाइनान्सको ३ प्रतिशत मूल्य घट्यो ।

जानाकी फाइनान्स, एनआरएन इन्फ्रास्ट्रक्चर, पिपुल्स हाइड्रोपावर, नेपाल फाइनान्स, सप्तकोशी विकास बैंक, बेस्ट फाइनान्स, रसुवागढी हाइड्रोपावर कारोबार रकमका आधारमा क्रमशः अगाडि देखिए ।